छत्तीसगढ़ी फिलिम के हिरो अनुज शर्मा ह अपन अंग के रक्षा खातिर आरोग्य सेतु ल बॉडीगार्ड बनाये हाबे। जेन उंकर मोबाइल म रिथे, दिन-रात ओकर अऊ परिवार के रक्षा करथे। सुनके अकचकाव झिन संगी हो, ये बात सिरतोन आए। भारत सरकार के स्वास्थ्य मंत्रालय कोति ले कोरोना महामारी ले बांचे खातिर एक मोबाइल एप बनाये गे हावय।
जेन कोरोना राई ले बांचे के सबो उपाय ल बताथे। अनुज शर्मा जी उही एप ल अपन मोबाइल म डाउनलोड करके सुरक्षित हाबे। ओमन इही बात ल लेके एक ठी सुघ्घर वीडियो घलोक बनाये हाबे जेन आजकल सोशल मीडिया म तउंरत हाबे। अनुज शर्मा अपन वीडियो म किथे के आप मन भी आज अऊ अभी आरोग्य सेतु एप डाउनलोड करव। सेतु मोर बॉडीगार्ड ए अउ आपके भी। बिपत के बेरा म छत्तीसगढ़ के बड़का कलाकार मन अपन-अपन सामाजिक जिम्मेदारी निभावत हावय लोगन ल जागरूक करके। अऊ अनुज शर्मा मन तो सरलग युनिसेफ संग मिलगे लोगन म जागरूकता लाने के जबर उदीम करत हाबे। सेतु एप के ये वीडियो ल अनुज शर्मा के जम्मो सोशल साइड के अलावा माई गो इंडिया म तको देखे जा सकथे।