जब संसद म जनता के आवाज नइ सुने जाही तव सड़क म संग्राम होही : श्रीमती छाया वर्मा

अंजोर.रायपुर, 3 अगस्त। छत्तीसगढ़ ले राज्यसभा सदस्य श्रीमती छाया वर्मा हमेशा अपन राज के जनता खातिर संसद म जबर गोहार करथे। छत्तीसगढ़ी भाखा ल आठवीं अनुसूची म संघारे के बात होवय या गरीब जनता के सेहत के, ओमन अपन बात दमदारी ले रखथे। फेर जब-जब उंकर बात ल कोनो अनसुना करे हावय ओमन सदन ले सड़क तक के लड़ाई तको लड़े हावय। 

श्रीमती वर्मा ह आज दिल्ली म बाड़त महंगाई म सरकार कोति ले कोनो ठोस कदम नइ उठाये, अऊ उलटा उंखर आवाज ल दबाये के सेती ओमन सड़क म उतरीस। सोशल मीडिया ले मिले आरो के मुताबिक ओमन आज महंगाई के खिलाफ जबर विरोध प्रदर्शन करत सइकिल म निकलिस। ओन सोशल मीडिया म फोटो तको पोस्ट करे हावय जेन म लिखे गे हावय- ‘जब संसद में जनता की आवाज नहीं सुनी जाएगी तो सड़कों पर संग्राम होगा।’