गरियाबंद पुलिस सुघ्घर उदीम : पर्यटन ठउर म टूरिस्ट पुलिस के शुरुआत, राजीव लोचन मंदिर राजिम, जतमई, घटारानी, चिंगरापगार म होही तैनात

अंजोर.गरियाबंद, 2 अगस्तज। गरियाबंद पुलिस अधीक्षक श्रीमति पारूल माथुर के पहल ले टूरिस्ट पुलिस गरियाबंद के शुरुआत जतमई धाम ले करे गे हावय। गरियाबंद पुलिस ह पर्यटक मनके सुरक्षा अउ बचाव के खातिर जिला के सबो प्रमुख पर्यटक जगह म टूरिस्ट मदद केन्द्र शुरू करे हावय। ये पर्यटन केन्द्र म पीली जैकेट पहिने टूरिस्ट पुलिस भी पर्यटक मनके मदद के खातिर हमेशा तैनात रइही। टूरिस्ट पुलिस के पास कोनो भी आपातकालीन स्थिति ले निपटे खातिर के सुविधाभी उपलब्ध रइही।

गरियाबंद जिला के अधिकांश क्षेत्र पर्यटन के खातिर प्रसिद्ध हावय। इहां दूर-दूर ले लोगन पर्यटन के खातिर आथे। पर्यटन ल कई रकम के अप्रिय घटना हो जात हावय। घटना के पहिली बचाव बर टूरिस्ट पुलिस के शुभारंभ करे हावय। 28 पुलिस कर्मी के 07-07 के अलग-अलग टीम बनाके जिला के पर्यटन स्थल जतमई मंदिर, घटारानी मंदिर, राजीव लोचन मंदिर, चिंगरापगार म ड्यूटी लगाये गे हावय। टूरिस्ट पुलिस के विशेष पहचान बर पीला रंग के टी शर्ट अउ नीला रंग के कैप पहिने रिहि जेमा टूरिस्ट पुलिस लिखे होही। जेकर पास सुरक्षा अउ बचाव के बर चिकित्सा कीट, रस्सी, टार्च, छाता अउ आन सुरक्षा के समान उपलब्ध रइही। जेकर ले जनसमान्य के तुरते मदद मिल सकही। लोगन के सुरक्षा बर पर्यटन जगह के सेल्फी जोन ल बैरिकेट करे जाही। जेकर ले आमजन के सुरक्षा हो सके।

गरियाबंद जिला के एसपी पारुल माथुर ह ए विषय म जादा जानकारी देत बताइन के जिला के जतमई, घटारानी, चिंगरापगार तनि राजीव लोचन मंदिर म टूरिस्ट पुलिस के बेवस्था करे गे हावय। शनिवार अउ रविवार के ये चारों जगह म पुलिस टीम मौजूद रइही जेन इहां पहुंचे पर्यटक के हर संभव मदद करही। कार्यक्रम म विशेष रूप ले उपस्थित पद्मश्री ले सम्मानित फुलबासन बाई यादव भी पुलिस के ए पहल के स्वागत करिन। ओमन किहिन के गरियाबंद के ये जगह म बड़ संख्या म प्रदेश भर ले पर्यटक पहुंचत हावय। पुलिस के मौजूदगी होए ले ये ठऊर मन म लोगन पहिली ले जादा सुरक्षित महसूस करही। ओमन पुलिस के ए पहल के बढ़ई करत बधाई दीस। 

कार्यक्रम म अति. पुलिस अधीक्षक सुखनंदन राठौर, अति. पुलिस अधीक्षक संतोष महतो, अनुविभागीय अधिकारी पुलिस गरियाबंद संजय ध्रुव, रक्षित निरीक्षक उमेश राय, थाना प्रभारी छुरा निरीक्षक संतोष भुआर्य, थाना प्रभारी पाण्डुका निरीक्षक बसंत बघेल, थाना प्रभारी राजिम निरीक्षक विकाश बघेल, थाना प्रभारी गरियाबंद निरीक्षक वेदवती दरियो, थाना प्रभारी फिंगेश्वर उप निरी. भूषण चंद्राकर अउ अधिकारी कर्मचारी उपिस्थत रिहिन।