छत्तीसगढ़ म धान के दाम सबले जादा : मंत्री डॉ शिवकुमार डहरिया..., अंजोर छत्तीसगढ़ी म पढ़व पूरा खबर

अंजोर.रायपुर। नगरीय प्रशासन अउ विकास मंत्री डॉ. डहरिया ह किहिन के देश के आन राज्य के अपेक्षा छत्तीसगढ़ म धान के सबले जादा कीमत म किसान मन ल मिलत हावय। डॉ. डहरिया रायपुर जिला के विकासखण्ड आरंग के आने-आने प्राथमिक कृषि सहकारी समिति मन म हाल ही म मनोनित होइ समिति मन के अध्यक्ष ल सम्बोधित करत रिहिस। डॉ. डहरिया ह सबो अध्यक्ष ल उंकर समिति अध्यक्ष मनोनीत होए म बधाई अउ सुभकामना दीस। ओमन अध्यक्ष ले किसान मन के हित म काम करे के गेलौली करिन। डॉ. डहरिया ह किहिन के प्रदेस म धान खरीदी सहकारी समिति (सोसायटी) के माध्यम ले किसान मन ले करे जात हावय। ओमन बताइन के पाछु साल प्रदेस सरकार ह 105 लाख मीट्रिक टन धान खरीदी के लक्ष्य रखे रिहिस जेन के विरूद्ध करीब 24 लाख 06 हजार पंजीकृत किसान मन ले 98 लाख मिट्रिक टन धान खरीदा गिस।

ओमन किहिन के ए साल 110 लाख मीट्रिक टन धान खरीदी के लक्ष्य रखे गे हावय अउ पंजीकृत किसान मन के संख्या लगभग 25 लाख ले ऊपर होए के अनुमान हावय। धान खरीदी बर किसान मन के 31 अक्टूबर तक पंजीयन करे के समय करार करे गे हावय। डॉ. डहरिया ह किहिन के पूरा हिंदुस्तान म छत्तीसगढ़ मात्र एक अइसे राज्य हावय जिहां किसान मन ले प्रति एकड़ 15 क्विंटल के हिसाब ले धान के खरीदी करे जात हावय। किसान मन के समर्थन कीमत अउ कृषि आदान मदद मिले ले खेती के प्रति किसान मन के लगाव बढ़े हावय। संग ही किसान मन के उंकर उपज के जादा दाम मिले ले साहूकार के चंगुल ले तको मुक्ति मिले हावय। प्रदेस सरकार के डहर ले सोसायटी के माध्यम ले किसान मन ले धान खरीदी के बढि़या संचालन करे जात हावय। ए मउका म मौजूद सहकारी समिति मन के मनोनीत सदस्य मन ह मंत्री डॉ. डहरिया के फूलमाला पहिना के स्वागत करिन।