अचानकमार टाईगर रिजर्व म दिखिस बघिरा

छत्तीसगढ़ राज्य के सबले बड़का टाईगर रिजर्व अचानकमार म वन्यप्राणी बाघ मनके गिनती खातिर कैमरा ट्रैप लगाये गे हाबे। जेन मा ब्लैक पैंथर दिखे के आरो मिले हाबे। जानबा होवय के बिलासपुर के अचानकमार म गजब अकन तेंदुआ, बंगाल टाइगर, जंगली भइसा जइसन नंदावत जीव मनके अलावा चीतल, धारीदार लकड़बग्घा, कैनीस, आलस भालू, ढोले, सांभर हिरण, नील गाय, चार सींग वाले हिरण अउ चिंकारा उक तको हाबे। नदिया-नरवा, जंगल-झाड़ी, डोगरी-पहाड़ी के अदभुत नजारा के बीच छत्तीसगढ़ के प्रसिद्ध अभयारण्य म ब्लैक पैंथर यानी करिया तेन्दुआ दिखना एक बड़का उपलब्धी आए छत्तीसगढ़ बर। 

ये बात के जानकारी देवत उप संचालक अचानकमार टाईगर रिजर्व ह बताइन के तेन्दुआ म मैलेनिन ज्यादा होए के सेती येहा करिया दिखथे, इही करिया तेन्दुआ ल ही ब्लैक पैंथर केहे जाथे। ब्लैक पैंथर कोनो आन प्रजाति के जीव नोहय। लइका मनके लोकप्रिय धारावाहिक मोगली म येकर नाव बघिरा राखे गे रहिसे। मोगली के संगी होए के सेती लइका मन बघिरा ल गजब पसंद करथे। अब अवइया दिन अइसन घलोक हो सकत हाबे के अचानकमार टाईगर रिजर्व म लइका मन बघिरा देखे बर उमिया जाही। रायपुर.20