बस्तर टाईगर महेन्द्र कर्मा के नाम म होही अब बस्तर विश्वविद्यालय

रायपुर। झीरम घाटी के नक्सली नरसंहार म शहीद होए प्रदेश के बड़का नेता मनके सुरता म उनला सादर श्रद्धांजलि देवत 25 मई के छत्तीसगढ़ म ‘झीरम श्रद्धांजलि दिवस’ मनाये गीस। ये मउका म प्रदेश के मुख्यमंत्री श्री भूपेश बघेल ह राजीव भवन म आयोजित कार्यक्रम म सबो शहीद मन ला नमन करिन। श्रद्धांजलि सभा म सर्वश्री ताम्रध्वज साहू, टीएस सिंहदेव, रविन्द्र चौबे, डॉ. शिवकुमार डहरिया, चरणदास महंत अउ मोहन मरकाम के अलावा प्रदेश के सबो मंत्री मन जुरियाए रिहिन। 

प्रदेश के मु‍ख्यमंत्री श्री बघेल ह ये मउका म घोसना करिन के बस्तर विश्वविद्यालय के नाम अब बस्तर टाईगर के नाम ले मशहूर कांग्रेस के बड़का नेता स्व. महेन्द्र कर्मा के नाम म करे जाही। बस्तर के माटी ले जुड़़े जननायक श्री कर्मा ह बस्तर के सुख अउ शांति खातिर जबर बुता करिन। मुखिया के घोसना के बाद सबो नेता मन प्रसन्नता व्यक्त करत किहिन के इही सच्चा श्रद्धांजलि आए।