कोरोना के संग सुविधा तको बाढ़त हाबे, ऑटो अउ टेक्सी के बाद आन जिला बर ई-पास

रायपुर। छत्तीसगढ़ म तको अब कोरोना पांव पसारत हाबे। रोजेच नवा कोविड-19 संक्रमित मरीज के आंकड़ा बाढ़त जाथे। आजतक के ताजा जानकारी के मुताबिक राज्य म कुल 281 मरीज भर्ती हाबे। जेन म रायपुर एम्स म 85, कोविड अस्पताल माना म 86, कोविड अस्पताल बिलासपुर म 39, मेडिकल कॉलेज अस्पताल अंबिकापुर म 22, मेडिकल कॉलेज अस्पताल रायगढ़ म 12, मेडिकल कॉलेज अस्पताल राजनांदगांव म 34 झिन के उपचार चलत हाबे। भारत म कोविड-19 के आंकड़ा देखन तव देश के 35 राज्य म कुल 151767 लोगन संक्रमित हाबे। जेमा से 4337 के मउत तको होगे। 

अइसन म लोगन ल अऊ जादा सावधानी बरते के जरूरत हाबे। लॉ‍कडाउन के थिराती म बाढ़त कोरोना के संक्रमण म अब सरकार तको कोनो लगाम नी लगावत हाबे। उलटा धीरे-धीरे सबो बंद दुवारी ल खोलत हाबे जिहा ले कोविड़-19 के आए के संभावना दिखत हाबे।  अब सरकार तको कतेक ल बरजए, लोगन मन के सुविधा ल देखत ये सबो म सोहलियत करे जावथे। अब तो आन जिला म जाए खातिर टैक्सी-आटो के चले के अनु‍मति मिलगे, शर्त के साथ। परिहवन विभाग कोति ले मिले आरो के जिला म ऑटो अउ टैक्सी नियम के मुताबिक चलही फेर आन जिला म जाए बर ई-पास अनिवार्य रही। साथ ही मास्क, स्वच्छता अउ फिजिकल डिस्टेंसिंग के पालन करे ल परही। आन जिला जाए खातिर सीजी कोविड-19 ई-पास एप्लीकेशन ले मिलही येकर अलावा वेबलिंक https://epass.cgcovid19.in ले तको मोबाइल नंबर ले रजिस्टर करके ई-पास बना सकथे।