छत्तीसगढ़ ल मध्यप्रदेश ले जोड़इया पंडरिया-बजाग सड़क के सुरू होइस काम

छत्तीसगढ़ अउ मध्यप्रदेश ल जोड़ने वाला बड़का सड़क पंडरिया-बजाग के काम जोरसोर ले सुरू होगे हाबे। कबीरधाम जिला के पंडरिया ले मध्यप्रदेश के डिडौंरी जिला के बजाग वनग्राम तक कुल 35 किलोमीटर तक टू-लेन सड़क बनत हाबे। जेकर बर 128 करोड़ रूपिया के सरकार कोति ले स्वीकृति मिले हाबे। जानबा होवय के कोरोना लॉकडाउन के सेती येकर काम बंद होगे रिहिसे। अब छत्तीसगढ़ सरकार कोति ले सोशल डिस्टेंसिंग के साथ काम करे के निर्देश मिले के बाद लोक निर्माण विभाग डहर ले फेर सड़क के काम ल सुरू करे गे हाबे। जिला कबीरधाम के लोगन मन ल काम मिले के संग अब सड़क बने ले आवागमन तको बने ढंग ले हो पाही। ये मउका म जिला कलेक्टर अवनीश कुमार शरण ह निर्माण एजेंसी ल कोरोना वायरस के रोकथाम अउ संक्रमण ले बचाव खातिर जारी दिशा-निर्देश के पालन करत काम करे के निर्देश देवत सड़क निर्माण के काम के अवलोकन करिन।