1 जून ले सुरू होही 200 बिगर एसी वाला रेलगाड़ी : रेलमंत्री

लॉकडाउन के बाद ले देशभर म रेलगाड़ी के आवाजाही बंद हाबे। रेलवे ह ये बीच म अपन विशेष सेवा देवत कुछ मालगाड़ी अऊ बाद म श्रमिक स्पेशल ट्रेन चलाके मजदूर मनला अपन ठउर ठिकाना अमराए के तको बुता करिन। फेर रेल ह ओतका अकन नी चल पइस जतका के जरूरत रिहिसे इही पाके कुछ लोगन मन रेंगत या आन साधन म अपन घर कोति रेंगे बर मजबूर होगे। आज रेल मंत्री पीयूष गोयल ह बड़े घोसना करत रेलवे कोति ले अपन आधिकारिक ट्विटर म लिखे हाबे के राज सरकार मनले निवेदन हाबे के श्रमिक मनके जानकारी रेलवे ल देवय जेकर ले रेलवे ह स्पेशल ट्रेन चलाके ओ मजदूर मनला उंकर घर अमराही। ओमन आगू लिखे हाबे के भारतीय रेल 1 जून ले टाइम टेबल के अनुसार रोज 200 बिगर एसी वाला रेलगाड़ी चलाही जेकर ऑनलाइन बुकिंग लघियात सुरू हो जही। का सिरतोन म 1 जून ले सुरू हो पाही रेल ? ये तो अवइया बेरा ह बताही। फेर रेलमंत्री ह स्वयं जानकारी दे हाबे त जरूर उंकर तइयारी होही, अगोरव तब तक। नई दिल्ली.19