छत्तीसगढ़ सरकार प्रदेश ह फसल उत्पादन ल प्रोत्साहित करे अउ किसान मनला उंकर उपज के सही दाम देवाये खातिर राजीव गांधी किसान न्याय योजना शुरू करत हाबे। ये योजना ह देश के पूर्व प्रधानमंत्री स्व. श्री राजीव गांधी के पुण्यतिथि 21 मई ले वीडियो कांफ्रेसिंग के जरिए प्रदेश म लागू होही। योजना के माध्यम ले प्रदेश के 19 लाख किसान मनला 5700 करोड़ रूपिया के राशि चार किश्त म सीधा उंकर खाता म देही। राजीव गांधी किसान न्याय योजना म सरकार ह 18 लाख 34 हजार 834 किसान मनला बोनस के पहिली किश्त के 1500 करोड़ रूपिया बाटही। अइसने गन्ना के एफआरपी राशि 261 रूपिया प्रति क्विंटल, प्रोत्साहन अउ आदान सहायता राशि 93.75 रूपिया प्रति क्विंटल माने अधिकतम 355 रूपिया प्रति क्विंटल के दर ले भुगतान करे जाही। येमा प्रदेश के 34 हजार 637 किसान मनला 73 करोड़ 55 लाख रूपिया चार किश्त म मिलही। जेमा से पहिली किश्त 18 करोड़ 43 लाख 21 मई ले दे जाही। छत्तीसगढ़ सरकार कोति ले अइसने सहकारी शक्कर कारखाना के माध्यम ले खरीदे गन्ना के मात्रा के आधार म 50 रूपिया प्रति क्विंटल के दर ले प्रोत्साहन राशि (बकाया बोनस) खातिर 24 हजार 414 किसान ल 10 करोड़ 27 लाख रूपिया देही। जानबा होवय के पहिली घलो छत्तीसगढ़ सरकार के मुखिया भूपेश बघेल के अगुवई म फसल बीमा अउ प्रधानमंत्री किसान सम्मान योजना के तहत 900 करोड़ के राशि उंकर खाता म आए हाबे। संगे-संग राज्य सरकार लगभग 18 लाख किसान मनके 8800 करोड़ रूपिया के कर्जा माफी तको करे हाबे। रायपुर.19
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।