रायपुर. छत्तीसगढ़ के मुख्यमंत्री श्री भूपेश बघेल ह बिपत के बेरा म आर्थिक सहयोग खातिर जनता ले मिले रकम के जनता ल एक-एक पइसा के हिसाब देवत हाबे। श्री बघेल ह देश के पहिली अइसन मुखिया आए जेन अपन होके आम जनता ल हिसाब-किताब देवत हाबे। उंकर बताये मुताबिक 24 मार्च ले लके 7 मई तक मुख्यमंत्री सहायता कोष म दानदाता मन कोति ले कुल 56 करोड़ 4 लाख 38 हजार 815 रूपिया मिले हाबे। जेमा से कोरोना के रोकथाम अउ जरूरतमंद के सहयोग खातिर राज्य के जिला मन ला 10 करोड़ 25 लाख 30 हजार रूपिया के राशि जारी करे जा चुके हाबे। जनता के बड़ मयारूक मुखिया श्री बघेल ह किथे के जब बिपत म लोगन मन सरकार ऊपर भरोसा जताइन तव पारदर्शिता ल बरकरार रखना मोरो कर्तव्य आए। विश्वास हाबे के आप मनके सहयोग आगू घलोक मिलते रइही।
