मुंगेली.23। छत्तीसगढ़ माध्यमिक शिक्षा मंडल कोति ले जारी हायर सेकेण्डेरी परीक्षा अउ हाई स्कूल परीक्षा म प्रावीण्य सूची म अवइया लइका मन ल प्रदेश के मुख्यमंत्री श्री भूपेश बघेल ह स्वयं फोन करके बधाई देवत उंकर पालक मन ले तको गोठबात करके शुभकामना दे हाबे। एसो हाई स्कूल परीक्षा के प्रावीण्य सूची म 42 विद्यार्थी अउ हायर सेकेण्डरी परीक्षा के प्रावीण्य सूची म 16 विद्यार्थी मन जगह बनाये हाबे।
हाई स्कूल परीक्षा म कुल 73.62 प्रतिशत परीक्षार्थी मन उत्तीर्ण होइन जेमा बालिका के प्रतिशत 76.28 अउ बालक के प्रतिशत 70.53 हावय। अइसने हायर सेकेण्डरी परीक्षा म कुल 78.59 प्रतिशत परीक्षार्थी मन उत्तीर्ण होइन जेमा बालिका के प्रतिशत 82.02 अउ बालक के प्रतिशत 74.70 हावय। माने पऊर साल ले एसो हाई स्कूल के परीक्षा परिणाम म 5.42 प्रतिशत अउ हायर सेकेण्डरी स्कूल परीक्षा परिणाम म 0.16 प्रतिशत के बढ़ोत्तरी होए हाबे।
मुखिया श्री बघेल ह अपन कार्यालय ले ही फोन के माध्यिम ले 10वीं के टॉपर अउ 12वीं के टॉपर मन संग गोठबात करिन। इही कड़ी म 12वीं म प्रदेश म प्रथम स्थान पाने वाला टिकेश वैष्णव, सरस्वती शिशु मंदिर मुंगेली ल मुख्यमंत्री ह फोन म बधाई अउ शुभकामना दीस। ये मउका म सीएम श्री बघेल ह टिकेश के पिता शिवकुमार वैष्णव अउ माता श्रीमती शकुंतला वैष्णम ले तको हालचाल जानत बेटा के सुघ्घर भविष्य खातिर बधाई दीस।
आगू मुखिया जी मन जेन लइका मन परीक्षा म असफल होगे या कम नंबर आए हाबे ओमन ल निराश होए के बजाए हिम्मत अउ मेहनत ले सरलग पढ़ाई करे के समझाईश देवत किहिन के फेर नवा ऊर्जा अउ उत्साह ले तइयारी के संकल्प करव। परीक्षा के संगे-संग जीवन म सफलता जरूर मिलही।
मुख्यमंत्री श्री बघेल ने फोन से 12वीं बोर्ड के टाॅप-10 मे प्रथम स्थान प्राप्त करने वाले जिले के छात्र श्री टिकेश वैष्णव और उनके माता-पिता से की बात@MungeliDist@ChhattisgarhCMO@DPRChhattisgarh@amitlahre1@bhupeshbaghel pic.twitter.com/iELHxkG7Td— Mungeli (@MungeliDist) June 23, 2020
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।