मरीज मनके सुरक्षा खातिर अम्बेडकर अस्पताल ल बांटिस तीन जोन म

रायपुर.08। कोविड-19 संक्रमण के फैलाव के रोकथाम ल देखत छत्तीसगढ़ के बड़का अस्पताल डॉ. भीमराव अम्बेडकर स्मृति चिकित्सालय रायपुर ल तीन जोन म बांटे गे हाबे। ये बेवस्था म वार्ड मनला अलग-अलग करे गे हाबे जेमा के लोगन मन एक जोन ले दूसर जोन म नइ जा सके। पहिली जोन म कन्फर्म कोविड-19 के मरीज मनला राखे जाही। इहां आन लोगन मनके आवाजाही बंद रइही। दूसरइया जोन म संभावित मरीज मनला राखे जाही जेकर म कोविड-19 के लक्षण रइही, फेर सैम्पल जांच के रिपोर्ट आना बाकी रही। अउ तीसर जोन म आन मरीज मन रइही जिहा आने बीमारी मनके इलाज होही। 

अस्पताल के चिकित्सा अधीक्षक डॉ. विनित जैन ले मिले आरो के मुताबिक अइसन नवा बेवस्था करे ले बड़का फायदा ये होही के डॉक्टर, पूरा स्टॉफ अउ चिकित्सालय इलाज करइया मनला जानकारी रइही के कोन वार्ड म कोन मरीज हाबे। एक ले दूसर के वार्ड म कोनो नइ झांक सके। जोन के रूप म अस्पताल के विभाजन सिरिफ लोगन के सुरक्षा खातिर करे जावथाबे। मरीज अउ उंकर परिवार वाले मन खातिर ठउर-ठउर म डिस्प्ले बोर्ड तको लगाए जाही।