रायपुर.09। छॉलीवुड के चुलबुली अदाकारा अनिकृति चौहान आजकल टिक टॉक म तको जबर धमाल मचावत हाबे। अइसने करके ओमन लॉकडाउन के दिन काटे के संगे-संग अपन मयारूक दर्शक मन ले तको जुरे रिथे। काबर के दर्शक मन कोनो ल पसंद करथे तव उंकर हर नवा गीत-संगीत, फोटो अउ वीडियो के अगोरा म रिथे। अनिकृति लगातार सोशल मीडिया के माध्यम ले नवाचार करते रिथे। टिक टॉक के अलावा इंस्टाग्राम अउ फेसबूक म तको उंकर गजब फैंस फॉलोअर्स हाबे। आजकल ओमन के टिक टॉक अकाउंट म फॉलोअर के तो बाढ़ आगे हाबे।
थोरकेच दिन म माने इही महीना म उंकर फॉलोअर के संख्या 1 लाख ले आगर होवइया हाबे। ये जून के महीना अनिकृति चौहान बर तो अऊ गजब महत्ता के हाबे काबर के इही महीना म उंकर सुपरहिट फिल्म हंस झन पगली फंस जबे रिलीज होइस रिहिसे जेन ओला छॉलीवुड के ब्लॉकबस्टर अदाकारा के पदवी दीस। अनिकृति के फिलिम के अगोरा करइया मन अब कोरोना राई के सेती फिलिम भले नी देख पात हाबे त का होगे लोगन उनला टिक टॉक अउ इंस्टाग्राम म देखके मगन हाबे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।