सिनेमा कलाकार मन सरकार ले आर्थिक मदद के मांग करत सांकेतिक धरना दीस

रायपुर.22। राजधानी रायपुर के धरना ठउर बुढ़ा तरिया तिर म छत्तीसगढ़ के कुछ कलाकार मन अपन मांग ल लेके शांति पूर्वक सांकेतिक धरना करिन। जानबा होवय के कोरोना काल म पाछु तीन महीना ले सबो के काम बुता बंद हावय येमा कलाकार मन तको जबर प्रभावित होए हाबे। प्रदेश के कलाकार मन मांग करत हाबे के छत्तीसगढ़ संस्कृाति विभाग अपन बजट ल अब कोनो संगठन ल आयोजन बर न देके प्रत्येक कलाकार ल दस-दस हजार रूपिया आर्थिक मदद के रूप म प्रदान करय। 

येकर अलावा पंजीकृत संस्था मनला पांच कार्यक्रम के अग्रिम राशि तको देवय जेला बाद म कार्यक्रम के बाद काटे जाए। साथ ही विभाग कोति ले कला जगत ले जुड़े लोगन मनला आर्थिक मदद, आवास अउ स्वास्थ्य बीमा जइसन सुविधा तको मिलना चाही। ये सब मांग ल लेके लोक कलाकार, फिल्म अभिनेता संतोष सारथी के साथ योगेश अग्रवाल, शरद अग्रवाल, राजेश अवस्थी, नकुल महलवार, पवन गुप्ता, विजय श्रीवास्तव, अतिक खान, शंकर चंदनानी, पी.एल. एन. लक्की, तेजराम साहू, हिमांशू देवदास, पवन साहू, शेखर सोनी, हर्ष वर्धन पारसकर, हरीश साहू, धर्मेन्द्र सोनी, राजा महानंद सहित कई लोकमंच अउ फिल्मी कलाकार मन उपस्थित रिहिन।