छत्तीसगढ़ म तको टिड्डी के डर, जिला अउ विकासखंड स्तर म बचाव दल के गठन

राजनांदगांव। देशभर म किसान मन (टिड्डी) कनकट्टा कीरा के मारे हलाकान हाबे। जेन खेत ह आथे उहां के जम्मोर फसल ल बरबाद कर देथे। एजेंसी ले मिले आरो के मुताबिक राजनांदगांव म तको आ सकत हाबे, अभी कनकट्टा (टिड्डी) मन ह मध्यप्रदेश अउ महाराष्ट्र म हाबे। जिला कलेक्टर श्री वर्मा ह आंक्रमण के संभावना ल देखत जिला स्तर अउ विकासखंड स्तर म नियंत्रण कक्ष अउ नोडल अधिकारी के नियुक्ति करे हाबे। राजनांदगांव जिला स्तरीय नियंत्रण कक्ष खातिर वन मंडलाधिकारी खैरागढ़, उप संचालक कृषि, वरिष्ठ वैज्ञानिक अउ प्रमुख कृषि विज्ञान केन्द्र सुरगी, सहायक संचालक कृषि अउ सहायक संचालक उद्यान राजनांदगांव ल नोडल अधिकारी नियुक्त करे गे हाबे। अइसने विकासखंड खैरागढ़, डोंगरगढ़ अउ छुईखदान म अनुविभागीय अधिकारी राजस्व, अनुविभागीय कृषि अधिकारी, मुख्य कार्यपालन अधिकारी जनपद पंचायत, वरिष्ठ कृषि विकास अधिकारी के संग ग्राम स्तरीय नियंत्रण कक्ष खातिर सचिव या ग्राम रोजगार सहायक, ग्रामीण कृषि विस्तार अधिकारी, ग्रामीण उद्यान विस्तार अधिकारी अउ कोटवार मन नोडल होही। 

ग्राम स्तरीय दल के बुता

टिड्डी दल दिखे म ग्रामीण मन मुनादी कराके आन मनला तको आरो करही। येकर ले बचाव खातिर ध्वनि विस्तारक यंत्र जइसे मांदर, ढोलक, डी.जे., खाली टीना के डब्बा, थारी, ट्रेक्टर के सायलेंसर के जोर-जोर ले आवाज करय। कहू कनकट्टा कीरा (टिड्डी) फसल म बइठे हाबे तव ट्रेक्टर माउण्टेड, पावर स्प्रेयर, शक्ति चलित स्प्रे पंप, हस्त चलित स्प्रे पंप आदि ले रासायनिक कीटनाशक के छिड़काव बर तइयार राहव। जानकारी के मुताबिक कनकट्टा कीरा मन दिन म उड़थे अउ रात के पेड़-पौधा म बइठथे। बिहनिया होए म फेर ये मन हवा के संग जे कोति के हावा रिथे तेने कोति उड़ा जथे।