पुरानी बस्ती, थाना कंटेनमेंट जोन ल लोगन सेल्फी जोन बनाए परत हाबे, हद होगे भई...

रायपुर.24। रायपुर के पुरानी बस्ती थाना म पदस्थ पुलिस के परिवार के सदस्य मनके रिपोर्ट कोरोना पॉजिटिव आए के बाद लेही थाना ल सील कर दे गे हाबे। साथ ही सबो स्टाफ ल कोरेंटिन कर दिये गे हाबे। प्रशासन कोति ले थाना के बाहिर आमजन ल आरो दे खातिर बोर्ड लगाये गे हाबे के पु‍रानी बस्ती थाना केंटेनमेंट जोन घोसित होए के सेती इहां के जम्मो बुता ल था‍ना टिकरापारा या आजाद चौक म करे जाही।

हद तो तब होगे जब थाना के सबो रस्ता ल बंद करके बाहिर बोर्ड लगे हाबे तेने म अब आम लोगन मन रूकके मोबाइल म सेल्फी लेवत हाबे। ये बात ल सेल्फी लेवइया के फोटो सहित एसएसपी महोदय ह तको अपन आधिकारिक ट्विटर म लिखे हाबे के पुलिस थाना पुरानी बस्ती, रायपुर के सामने सेल्फी लेवे खातिर उमड़त हाबे लोगन, जेन ह कंटेंमेंट जोन आए। का कहवं येमा उत्सुकता, चिंता, बहादुरी, मूर्खता या अऊ कांही...?

लोगन म थोरको डर भय नी दिखत हाबे। लागथे अब कोरोना तो अइसने खुवार हो जही।

People thronging to take selfies in front of Police station Purani Basti, Raipur declared as Containment zone....Should I call it curiosity, anxiety, bravery ,foolishness or...?? pic.twitter.com/5H6pTqJ5Wb

— Arif Shaikh (@arifhs1) June 24, 2020