टास्क फोर्स के टीम ह भीख मांगत लइका ल बाल गृह अउ माईलोगिन ल भेजिस सखी सेंटर

रायपुर.10। अंतर्राष्ट्रीय बाल श्रम प्रतिषेध दिवस के अगाहू महिला बाल विकास विभाग के टास्क फोर्स टीम ह रायपुर म अभियान चलाके भीख मांगत पांच लइका अउ दू माईलोगिन ल पकडि़न। येकर अलावा तिल्दा विकासखण्ड के ग्राम सरोरा गांव म दाई-ददा मनला समझाइस देके नाबालिक लइका के बिहाव ल तको रोकवाइस। ये बात के जानकारी देवत विभाग कोति ले बताये गे हाबे के महिला बाल विकास विभाग के सचिव आर. प्रसन्ना के मार्गदर्शन टास्क फोर्स के टीम ह बाल मजदूरी, भीख मंगईया, नशा पीड़ित लइका मनला बने रद्दा म लाने के उदीम करत हाबे। जिला बाल संरक्षण अधिकारी नवनीत स्वर्णकार के बताये मुताबिक राजधानी के तेलीबांधा म भीख मांगत पांच लइका अउ 2 महिला मिलिस। जेमा लइका मनला बाल गृह अउ महिला मनला सखी सेंटर पठोये गे हाबे जिहा उंकर मनले भीख मांगे के कारण ल जाने के साथ ही दूर करे के कोशिश करे जाही। येकर अलावा मौदहापारा म एक लइका, भनपुरी म दू लइका अउ ट्रांसपोर्ट नगर टाटीबंध म दो लइका बाल मजदूरी करत धराये हाबे जेमा किशोर न्याय अधिनियम के तहत कार्रवाई करे गीस।