सेजबहार हाउसिंग बोर्ड कॉलोनी म चोरी, तारा टोरके लेगे चोरहा मन थारी-बर्तन अउ टीवी

रायपुर.29। रायपुर शहर ले लगे थाना मुजगहन के सेजबहार हाउसिंग बोर्ड कॉलोनी के एक घर म चोरी होगे। मुजगहन थाना म दर्ज एफआईआर क्रमांक 0107/2020 के मुताबिक हाउसिंग बोर्ड कालोनी के एलआईजी 362 म रहइया प्रमोद साहू ह विद्युत विभाग म लाइन मेन के काम करथे। ओमन अपन पत्नी संग 19 जून के संझा पूजा कार्यक्रम म सामिल होए खातिर भिलाई गिस। उहां ले 23 जून के आइस त देखिन तब घर के तारा टूटे रिहिसे। 

आरो मुताबिक चोरहा मन घर ले एलईडी टीवी, फुलकांस के लोटा-थारी संग आन 3500 रूपिया के समान ल चोरा के लेगे। आस परोस के मनले कांही सोर पता नइ मिले के बाद मुजगहन म थाना 27 जून के रिपोर्ट लिखाये हाबे जेमा पुलिस ह भादंसं 1860 के धारा 3802, 457 तहत आगू के कार्यवाही करत हाबे।

डूण्डा न्यू स्वागत विहार के व्यवसायिक परिसर म चोरी

डूण्डा के बाहिर म न्यू स्वागत विहार के व्यवसायिक परिसर म तको चोरहा मन हाथ साफ करगे। उहां के दुकान नं. 103 म जेन ल सर्वग्य शुक्ला के ऑफिस बताये गे हाबे। चोर मन दुकान के शटर टोरके भीतर घुसे हाबे। आरो के मुताबिक ऑफिस ले सैमसंग कंपनी के फ्रीज अउ जुन्ना खराब लेपटाप चोरी होए हाबे।