नारायणपुर.07। नक्सल हिंसा पीड़ित परिवार मनला सरकार के जनकल्याणकारी योजना के लाभ पहुंचाये खातिर नारायणपुर जिला म समस्या निवारण शिविर के आयोजन करे गिस। शिविर म स्वास्थ्य, श्रम, महिला अउ बाल विकास, खाद्य, पंचायत अउ समाज कल्याण, राजस्व संबंधी कार्यालय के अधिकारी-कर्मचारी मन लोगन के आवेदन झोकिन। मिले आरो के मुताबिक कलेक्टर श्री सिंह ह शिविर म कोरोना वायरस महामारी ले बचाव खातिर सोशल अउ फिजिकल डिस्टेंसिंग के साथ-साथ मास्क, सेनिटाइजर के उपयोग करे के तको निर्देश दे रिहिसे।
ये मउका म स्वास्थ्य विभाग ह 77 लोगन के स्वास्थ्य परीक्षण करत निःशुल्क दवई दीस। उंहचे 18 कुपोषित लइका मिले ले पोषण पुर्नवास केन्द्र ले जाए के कार्यवाही करे गीस। पेंशन खातिर 35 आवेदन समाज कल्याण विभाग ल अउ राशन कार्ड के 51, राशन कार्ड शिफ्टिंग के 21 अऊ नाम जोड़वाए के 20 आवेदन संग दू दिन के शिविर म कुल 800 आवेदन मिलिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।