कबीरधाम.10। छत्तीसगढ़ के कबीरधाम जिला के कुण्डा थाना क्षेत्र म होए लगभग 72 लाख रूपिया लूट कांड के 24 घंटा के भीतर फर्दाफास होगे। पुलिस ले मिले आरो के मुताबिक प्रार्थी ही निकलिस लूट कांड के सूत्रधार, संग म 6 अऊ आरोपी गिरफ्तार होए हाबे। आरोपी मनके निशानदेही म पुलिस ल लूट के 68 लाख 50 हजार रूपिया तको बरामद होगे हावय।
जानबा होवय के कबीरधाम जिला के कुण्डा क्षेत्र के गांव जंगलपुर ले खैरवार के बीच अज्ञात आरोपी मन कवर्धा के दिलीप अग्रवाल के राईस मिल के मुंशी मनोज कुमार कश्यप ले 71 लाख 56 हजार रूपिया लूट ले रिहिसे। मुंशी के बताये मुताबिक ओकर मालिक ह कवर्धा ले बिलासपुर लेगे खातिर रकम दे रिहिसे जेन ला बोरी म बांध के मोटर सायकिल म संगी पारस यादव ल पाछू म बइठा के मोहनी पैलेस ले रबेली रोड होवत जंगलपुर अउ खैरवार गांव कोति ले आवत रिहिन तभे पाछू कोति ले धकका मारके अज्ञात आरोपी मन गिरा दिस अउ आंखी म मिर्चा छितके रूपिया के बोरी ल धरके भगागे।
घटना के बाद मुंशी मनोज कुमार कश्यप कोति ले अपन मालिक ल आरो करत पुलिस म तको रिपोर्ट दर्ज करासे गिस। पुलिस कोति ले थाना कुण्डा जिला कबीरधाम अपराध क्रमांक 00/20 धारा 394 भादवि के तहत मामला दर्ज करे के बाद। प्रार्थी मनोज कुमार कश्यप पिता लाला कश्यप उम्र-31 साल ग्राम गेगडा थाना पिपरिया ले बयान के आधार म ही पूछताझ सुरू करे गिस। आन-आन बयान के आधार म पुलिस अपन जांच सुरू करिस अउ 24 घंटा के भीतर ही अपराधी पुलिस के हाथ लगगे। मुंशी मनोज कुमार कश्यप ही लूट के कहानी गढ़े रिहिसे। कबीरधाम पुलिस ह लूट के रकम के साथ आन आरोपी मनला तको गिरफ्तार करे म सफलता पाये हाबे।
कबीरधाम पुलिस— Kabirdham Police (@Kabirdhampolice) July 10, 2020
24 घंटे के भीतर लूट की गुत्थी सुलझी
प्रार्थी ही निकला, लूट का सूत्रधार
68 लाख 50 हजार रूपये बरामद
6 आरोपी गिरफ्तार । pic.twitter.com/mzgvL2NB3S
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।