देशी कट्टा अउ चाकू धरे किंजरत पांच बदमाश ल धरिस उरला पुलिस

रायपुर.09। उरला थाना रायपुर के हाथ लगिस वारदात के पहिली ही पांच बदमाश। पुलिस ल मुखबीर मनले सिंघानिया चौक के आस पास दू मोटर सायकल अपाचे नंबर CG04MM-4096 अउ CD डिलक्स नंबर CG04DK-0814 म 5 बदमाश मनके घूमे के आरो मिलिस। ओमन देसी कट्टा अउ चाकू तको धरे रिहिसे अउ कोनो कंपनी म डकैती करे के फिराक म रिहिसे। 

आरो पाके पुलिस ह बिहनिया 6:30 बजे घेराबंदी करके सिंघानिया चौक तिर पकडि़स। एफआईआर के मुताबिक धराये बदमाश अजय साहू उर्फ जागेश्वर पिता प्रकाश साहू, मिलन निषाद पिता बुधराम निषाद, तुलेन्द्र साहू पिता कुमार साहू, राजेश यादव पिता राजकुमार यादव, रविशंकर साहू उर्फ बोचू पिता मंतराम साहू मन के तलाशी म कट्टा अउ चाकू तको मिले हाबे। पुलिस के मुताबिक अजय साहू करा ले एक देसी कट्टा, 3 जिन्दा कारतूस। मिलन निषाद करा ले एक बटनदार चाकू अउ तुलेन्द्र साहू करा ले एक स्टील के धारदार चाकू। अइसने राजेश यादव करा ले एक खुखरीनुमा चाकू काला मुठ वाला अउ नाबालिक रविशंकर साहू करा ले गुप्तीनुमा चाकू बरामद होए हाबे। 

पूछताछ म पुलिस ल पांचों बदमाश मन मोटर सायकल, कट्टा अउ चाकू के बारे म कोनो जानकारी नइ दे पाइस। आरोपी यहू कबूले हावय के ओमन बंद फैक्ट्री म डकैती डाले के तइयारी म रिहिसे। उंकर उपर धारा 399,400 भादवि अउ 25 आर्म्स एक्ट के तहत अपराध पंजीबध्द करके आगू के कार्यवाही करे जावत हाबे।