छत्तीसगढ़ कांग्रेस प्रतिनिधीमंडल ह राजस्थान के संदर्भ म संज्ञान ले खातिर राष्ट्रपति के नाम ज्ञापन राज्यपाल ल सौपिन

रायपुर.27। छत्तीसगढ़ प्रदेश कांग्रेस अध्यक्ष श्री मोहन मरकाम के सियानी म आज एक प्रतिनिधीमंडल ह राज्यपाल सुश्री अनुसुईया उइके ले राजभवन म भेट करिन। प्रतिनिधीमंडल ह राज्यपाल महोदया ल राष्ट्रपति के नाम ज्ञापन सौपिन जेमा राजस्थान राज्य के निर्वाचित कांग्रेस के सरकार ल अलोकतांत्रिक तरीका ले अस्थिर करे के कृत्य म संज्ञान लेके मांग करे गे हाबे। 

प्रदेश कांग्रेस अध्यक्ष कोति ले जारी ज्ञापन म बताये गे हाबे के राजस्थान म लोकतांत्रिक तरीका ले निर्वाचित कांग्रेस के लोकप्रिय अशोक गहलोत जी के अगुवई वाला सरकार ल गिराये के कुचक्र भाजपा के सहयोग ले करे जावत हाबे। जेन ह अलोकतांत्रिक अउ संवैधानिक मूल्य के हत्या के समान आए। आगू मध्यप्रदेश, कर्नाटक, गोवा, मणिपुर अउ मेघालय के बाद राजस्थान के जिकर करत लिखे हाबे के येहा देश, देशवासी अउ प्रजातंत्र बर घातक आए जेकर जतके निंदा करे जाए कमेच होही। 

हमर आपसे आपेक्षा हावे के देश के संवैधानिक अउ प्रजातांत्रिक ढांचा ल बनाये राखे के मांग करत राजस्थान म विधानसभा के विशेष सत्र तुरते बलाये जाए अउ अलोकतांत्रिक कृत्य म रोक लगावत प्रकरण म हस्ताक्षेप करे के किरपा करव। ये मउका म प्रदेश कांग्रेस अध्यक्ष के अलावा वरीष्ठ कांग्रेसी नेता सर्वश्री धनेन्द्र साहू, सत्यनारायण शर्मा, गिरीश देवांगन अउ प्रमोद दुबे अलावा शैलेश नितिन त्रिवेदी मन तको राजभवन पहुंचे रिहिन हाबे।