छाती के मल्टीयूटीलिटी सेंटर बिहान के सदस्य मन सीएम ले करिन मुलाकात, गोबर अउ बांस के बने समान करिस भेट

रायपुर.26। मुख्यमंत्री निवास कार्यालय म धमतरी जिला के ग्राम छाती के मल्टीयूटीलिटी सेंटर बिहान के महिला सदस्य मन सिहावा विधायक श्रीमती डॉ. लक्ष्मी ध्रुव के नेतृत्व म मुख्यमंत्री श्री भूपेश बघेल ले मुलाकात करिन। ये मउका म समूह के दीदी मन मुख्यमंत्री ल गोबर अउ बांस ले बने उत्पाद भेंट करत गोधन न्याय योजना शुरू करे खातिर आभार व्यक्त करिन। मुख्यमंत्री ह समूह के बने उत्पाद मनके प्रशंसा करिस अउ निरन्तर प्रगति खातिर बधाई दीस। महिला मन ह मुख्यमंत्री ल छाती मल्टीयूटीलिटी सेंटर आये के नेवता तको दीस। 

धमतरी जिला के छाती मल्टीयूटीलिटी सेंटर बिहान के सदस्य मनके बताये मुताबिक उहां लगभग 15 स्व-सहायता समूह के 165 महिला मन कार्यरत हावय। स्वावलंबी स्व-सहायता समूह के सदस्य अउ बोरसी जनपद सदस्य श्रीमती नन्दिनी दुर्गेश साहू के समूह गत 3 वर्षों कार्यरत हावय। ओमन गोबर ले गणेश के प्रतिमा, गमला, झूमर, अऊ आन गौ उत्पाद बनाथे। छाती मल्टीयूटीलिटी सेंटर के शुभारंभ एक साल पहिली होए रिहिसे अब सेंटर म 165 महिला जुड़े हाबे। सेंटर म बाँस ले ट्री गॉर्ड निर्माण होथे, प्रति नग ट्री गॉर्ड के निर्माण ले एक महिला ल 100 रुपिया के आमदनी होथे। अउ एक महिला प्रतिदिन 3 ले 4 ट्री गॉर्ड बनाथे।  

ज्ञानदीप स्व-सहायता समूह के मन गोबर ले राखी, गणेश, गमला अउ बाँस ले पेपरवेट, चूड़ी-कंगन अउ महिला सौन्दर्य प्रसाधन आदि बनाथे। उंकर बताये मुताबिक ओमन अब तक लगभग 12 हजार 5 सौ राखी के विक्रय ले समूह ल 5 लाख 50 हजार रुपिया के आय प्राप्त होए हाबे। समूह कोति ले लगभग 16 एकड़ क्षेत्र म ग्रीन टी के तको उत्पादन करे जावत हाबे। ये ग्रीन टी म लेमन ग्रास, तुलसी, अदरक, लौंग अउ गिलोय के सम्मिश्रण हावय। जोन ह कोरोना महामारी काल म इम्युनिटी बढ़ाये म सहायक होथे।