रक्षाबंधन म एसो जेल के बंदी मन वीडियो कॉलिंग ले बहिनी संग करही गोठबात, कोरोना के सेती नइ बांधय राखी

रायपुर.01। प्रदेश के गृह अउ जेल मंत्री श्री ताम्रध्वज साहू ह संवेदनशीलता के परिचय देवत रक्षाबंधन के मउका म जेल म बंद कैदी मनला उंकर बहिनी मनले वीडियो कॉलिंग अउ फोन म बात करे के छूट देके निर्देश दे हावय। वैश्विक महामारी कोविड-19 के फैलत संक्रमण ल देखत ये निर्णय लिये गे हावय। जेल म कोनो ल मुलाकात करन नइ दे जाए। रक्षाबंधन के त्यौहार म भाई-बहन के प्रेम के प्रतीक आए। हरेक साल ये दिन जेल म बंद कैदी मनला उंकर बहिन मन राखी बांधे बर जेल जाथे फेर कोरोना राई के सेती एसो बंद रइही।

जेल मंत्री श्री साहू ह बहिनी अउ भाई के मया ल समझत येकर वैकल्पिक व्यवस्था खातिर अतिरिक्त पुलिस महानिदेशक जेल ल निर्देशित करिन हावय। कम से कम आके राखी नइ बांधे सकही तव फोन म गोठबात तो होही। श्री साहू ह यहू केहे हावय के जेल प्रबंधन तिर पोस्टल डाक ले राखी आए होही तव ओला जेल के अंदर पहुंचा देवय। भाई-बहन के ये तिहार म लोगन मनके जेन भावना जुड़े हावय ओकर सम्मान करथन, फेर जेल म नइ मिलन देके फैसला जनता के सुरक्षा ल ध्यान म राखत लिये गे हावय।