छत्तीसगढ़ के पहिली महिला सांसद मिनीमाता जी के पुण्यतिथि म प्रदेशवासी मन करत हाबे नमन

रायपुर.11। छत्तीसगढ़ के पहिली महिला सांसद मिनीमाता के पुण्यतिथि 11 अगस्त म उनला प्रदेश के मुख्यमंत्री, राज्यपाल, विधानसभा अध्यक्ष संग जम्मो प्रदेशवासी मन सादर नमन करत हाबे। ये मउका म मुख्यमंत्री जी ह किहिन के सरल अउ सहज व्यक्तित्व के धनी मिनीमाता अपन सरी जीवन ल मानव सेवा खातिर समर्पित कर दिस। असम म जन्मे मिनीमाता बिहाव के बाद छत्तीसगढ़ के जन-जीवन म रच-बस गे। दीन-दुखियां मनके सेवा खातिर ओमन आजीवन समर्पण के साथ लगे रिहिस। दलित मनके नागरिक अधिकार के रक्षा खातिर अस्पृश्यता निवारण अधिनियम ल संसद म पारित करवाये म उंकर जबर भूमिका रिहिसे। मजदूर मनला एकजुट करे खातिर ओमन छत्तीसगढ़ मजदूर संघ के गठन तको करिन। ममतामयी मिनीमाता के नाव ल दलित अउ महिला मनके उत्थान खातिर करे बुता के सेती सदा सुरता करे जाही।