बिलासपुर पुलिस के साइबर जागरूकता अभियान : ‘साइबर मितान’ एक कदम सजगता की ओर..., साइबर अपराध के रोकथाम खातिर जबर उदीम के होइस बढ़ई

बिलासपुर.08। सोशल मीडिया के दौर म हमन आए दिन साइबर अपराध के बारे म पढ़थन-सुनथन। ऑनलाइन ठगी ले लोगन मन गजब परेशान रिथे, पुलिस तिर तको लगातार अइसन अपराध के शिकायत आवत रिथे। अइसन म जागरूकता ले ही साइबर अपराध ल कम करे सकथे। अऊ इही सब बात ल लेके बिलासपुर पुलिस ह जिला म ‘साइबर मितान’ एक कदम सजगता की ओर मुहिम चलाइस 1 ले 8 सितंबर तक। 

साइबर मितान जागरूकता अभियान म लोगन मन बड़ चड़के हिस्सा लिस। आज अभियान के आखरी दिन बिलासपुर पुलिस ह येला महाअभियान के रूप देवत निष्ठा ले अपन बुता म लगे हावय। सोशल मीडिया के माध्यम ले प्रचार-प्रसार करत शार्ट मूवी ‘पेंशन टेंशन’, ‘ब्लैकमेल इश्क’, ‘मोनिका.कॉम’, ‘अनजान गिफ्ट’, ‘UNKNOWN FLIGHT’, ‘OLX fraud’, ‘कार्ड फ्रॉड’ अउ ‘आगाह’ जइसन लघु फिलिम के माध्यम ले लोगन ल जागरूक करे गिस। इही कड़ी म बॉलीवुड स्टार आफताब शिवदासानी ह तको बिलासपुर पुलिस के साइबर मितान जागरूकता अभियान ले जुड़के समाज के सबो वर्ग के लोगन खातिर प्रेरणा स्रोत बनिस। साइबर अपराध के रोकथाम खातिर साइबर मितान जागरूकता अभियान जइसे अनूठा अउ सार्थक पहल के सेती बिलासपुर पुलिस के चारो मुड़ा बढ़ई होवत हाबे।