सीपीडब्ल्यूडी अउ एलएंडटी करत हाबे आईआईटी भिलाई के निर्माण, जिला कलेक्टर श्री भुरे ह किहिन के स्थानीय मजदूर ल काम मिलना चाही

अंजारे.दुर्ग,23। आईआईटी भिलाई ल बनाये खातिर सीपीडब्ल्यूडी काम करत हाबे, जेमा फेस वन के काम एलएंडटी ल सउपे गे हावय। काम के देखरेख बर आज जिला कलेक्टर श्री भुरे ह कुटेलाभाटा आईआईटी कैंपस पहुंचिन। सीपीडब्ल्यूडी अउ एल एंड टी के प्रबंधन ह बताइन के येहा 720 करोड़ के प्रोजेक्ट आए जेमा के पहिली चरण म काम होवत हाबे। ये मउका म काम ल देखत कलेक्टर साहब किहिन के बतेक बड़का काम होवत हाबे, रोजगार के गतिविधी बढ़ही। जादा ले जादा स्थानीय मजदूर मनले कार्य कराये जाए। समाचार एजेंसी के मुताबिक कलेक्टर ह मउका म कैंपस म डिजाइन देखत किहिन के एरिया म आवत पेड़ ल बचाये जा सकही तव कुशलता ले तकनीकी बदलाव करे ताकि पेड़ भी बचें रहय अउ बिल्डिंग तको बन सकय। प्रबंधन बताइन के फेस वन के बुता जुलाई 2022 तक पूरा हो पाएगा।

ये मउका म सीपीडब्ल्यूडी ह कलेक्टर ल 3 मिनट के वीडियो देखइस, जेमा थ्री डी इमैजिनेशन आईआईटी के कैंपस तइयार दिखिस। जानबा होवय के कुटेलाभाठा अउ सिरसाखुर्द म 534 एकड़ कैंपस म बनत आईआईटी म बिल्डअप एरिया एक लाख 42 हजार वर्ग मीटर हावय। जेमा तीन एरिया होही, पहला हास्टल एरिया जेन 32 प्रतिशत भाग म होही। रेसीडेंशियल एरिया जेन 26 प्रतिशत हिस्सा म अउ तीसरा अकादमिक ब्लाक जेमा इंजीनियरिंग अउ साइंटिफिक ब्लाक होही, ये 42 प्रतिशत हिस्सा म होही।