स्वतंत्रता संग्राम सेनानी कन्हैया लाल अग्रवाल जी के निधन, राजकीय सम्मान के साथ आखरी विदाई

अंजोर.रायपुर, 22। प्रदेश के संस्कारधानी राजनांदगांव के दुलरवा सुराजी सेनानी श्री कन्हैया लाल अग्रवाल के आज 101 बछर के उमर म निधन होगे। एजेंसी ले मिले आरो के मुताबिक श्री अग्रवाल के निधन म प्रदेश के मुखिया भूपेश बघेल ह तको गहरा दुख व्यक्त करत ईश्वर ले दिवंगत आत्मा के शांति अउ शोकाकुल परिवार ल संबल प्रदान करे के प्रार्थना करे हावय। राजनांदगांव म स्व. श्री कन्हैया लाल अग्रवाल के आज राजकीय सम्मान के साथ अंतिम संस्कार करे जाही।

जानबा होवय के 101 साल के स्वतंत्रता संग्राम सेनानी कन्हैया लाल अग्रवाल के आज निधन होगे। ओमन राजनांदगांव म जन आंदोलन के पुरोधा रिहिन। प्रगतिशील लेखक संघ, भारतीय जन नाट्य संघ अउ अखिल भारतीय शांति, एकजुटता संगठन के आखरी बेरा तक सक्रियता ले जुरे रिहिस। पाछू बछर 20 अगस्त के उंकर 100 वां जनमदिन म मुख्यमंत्री भूपेश बघेल के विशेष उपस्थिति म नागरिक अभिनंदन करे गे रिहिस। ऐसो 3 जनवरी के रायपुर म आयोजित एप्सो के राष्ट्रीय सम्मेलन म तको सुदीर्घ सेवा खातिर उंकर सम्मान करे गे रिहिस।