धरसा विकास योजना ले गांव म खेत-खलिहान तक पहुंचे खातिर धरसा के कच्चा रस्ता ल पक्का बनाये जाही

अंजोर.रायपुर,07। प्रदेश के मुख्यमंत्री भूपेश बघेल कोति ले 6 अक्टूबर के स्वामी आत्मानंद के जयंती के मउका म सरकार कोति ले धरसा विकास योजना शुरू करे के घोषणा म तुरते अमल शुरू होगे हावय। ये योजना के क्रियान्वयन खातिर आने-आने विभाग के योजना के अभिसरण खातिर सामान्य प्रशासन विभाग ह तीन विभाग के सचिव मनके समिति गठित करे हावय। पंचायत अउ ग्रामीण विकास विभाग के प्रमुख सचिव, लोक निर्माण अउ राजस्व, आपदा प्रबंधन विभाग के सचिव ल ये समिति के सदस्य बनाये गे हावय। धरसा विकास योजना ले गांव म खेत-खलिहान तक पहुंचे खातिर धरसा के कच्चा रस्ता ल पक्का बनाये जाही।

विभागीय सचिव के तीन सदस्यीय समिति धरसा विकास योजना के क्रियान्वयन खातिर पंचायत, ग्रामीण विकास विभाग के योजना, मनरेगा, लोक निर्माण विभाग अऊ आन विभाग के योजना के अभिसरण के संबंध म एक सप्ताह के भीतर शासन ल प्रतिवेदन प्रस्तुत करही, अऊ समिति के पहली बइठक 9 अक्टूबर के होही।