कृषि विभाग के टीम ह बेरला अउ कोदवा के कीटनाशक दुकान के करिन निरीक्षण

अंजोर.बेमेतरा,09। किसान मनके फसल म सचरत रोग-राई अउ बाजार म बिकत आनी-बानी के कीटनाशक के भरोसी ल देखत शासन के निर्देशानुसार जिला म नकली कीटनाशक विक्रय के रोकथाम खातिर जिला अउ विकासखंड के निरीक्षण दल ह विकासखंड बेरला के मधुर कृषि केन्द्र बेरला, दुर्गा कृषि केन्द्र बेरला, महेश ट्रेडर्स कोदवा के निरीक्षण करिन। निरीक्षण म विक्रेता मनला कीटनाशी नियम के तहत श्रोत के आधार म कीटनाशक के भण्डारण करे, कृषक मनला कीट अउ रोग के पहचान करके कीटनाशक विक्रय करे के संग पाक्षिक प्रतिवेदन भेजे, मूल्य सूची अउ स्कंध संधारित करे खातिर निर्देशित करे गिस। 

ये मउका म किसान मनला जैवकीटनाशक के नाम म गलत कीटनाशक के विक्रय नइ करे के निर्देश दिए गिस। निरीक्षण म महेश ट्रेडर्स कोदवा ल बिना स्त्रोत जुड़वाये कीटनाशक के विक्रय, स्कंध संधारित नइ होए अउ आन अनियमितता पाये के कारण प्रतिबंधित के स्पष्टीकरण दिए गे हावय। आगू संतोषजनक प्रति उत्तर प्राप्त नइ होए म अनुज्ञप्ति पत्र निरस्त करे के कार्यवाही होही। कीटनाशक दुकान निरीक्षण दल म उप संचालक कृषि बेमेतरा एम.डी. मानकर, वरिष्ठ कृषि विकास अधिकारी बेरला हेमंत बघेल, आर.के. वर्मा, दौलत साहू सामिल रिहिन।