राष्ट्रपति कोविन्द जी ले राज्यपाल सुश्री उइके करिन भेंट मुलाकात

अंजोर.नई दिल्ली। राष्ट्रपति रामनाथ कोविन्द ले आज राष्ट्रपति भवन नई दिल्ली म राज्यपाल सुश्री अनुसुईया उइके ह सौजन्य मुलाकात करिन। ओमन राष्ट्रपति ल कोरोना काल म करे अपन बुता के प्रतिवेदन प्रस्तुत करिन। ये मउका म राज्यपाल ह बताइन के भारत सहित सम्पूर्ण विश्व वर्ष 2020 म कोरोना वायरस के संक्रमण के सेती प्रभावित रेहे हावय। अइसन कोरोना संक्रमण के संकट ले समाज, अर्थव्यवस्था, व्यापार, उद्योग, शिक्षा संग सबो क्षेत्र प्रभावित होए हाबे। सुश्री उइके ह किहिन के सुखद पहलू ये रेहे हावय के अब ये संक्रमण नियंत्रण म हावय अउ हमर देश म कम समय म वैक्सीन बनाके टीकाकरण तको सुरू कर दे गे हावय। ये सफलता कोरोना अवधि म आपके डहर ले समय-समय म  वीडियो कान्फ्रेन्स के माध्यम ले दे गे मार्गदर्शन अउ निर्देश के सेती ही संभव हो सके हावय। ओमन किहिन के मैं आपके निर्देश के अनुसार प्रदेश के अधिकारी, सामाजिक संगठन, विश्वविद्यालय, रेडक्रॉस सोसायटी आदि सबो संस्था मनला समय-समय म निर्देशित करत रेहेवं। संग म राज्यपाल सुश्री उइके ह राष्ट्रपति के आगू छत्तीसगढ़ ले जुरे अऊ आन केऊ मुद्द म चर्चा तको करिन।