छत्तीसगढ़ लोक सेवा आयोग म होगे लफड़ा जबर, कोन सच अउ कोन हे लबरा

अंजोर.रायपुर। छत्तीसगढ़ लोक सेवा आयोग ह सहायक प्राध्यापक (उच्च शिक्षा विभाग) परीक्षा-2019 के लिखित परीक्षा म अनुपस्थित छात्र के साक्षात्कार बर चिन्हांकन, 105 प्रश्न के विलोपन अउ दुर्ग जिला के एकेच परीक्षा केंद्र के लगभग 88 अभ्यार्थी के चिन्हांकन संबंधी शिकायत ल निराधार बतावत हावय।

आयोग ह किथे के प्रार्थी कोति ले मिले शिकायत के आधार म जांच करे गिस अऊ ओकर बात गलत निकलिस ये पाके शिकायत पाती ल नस्तीबद्ध करे जा चुके हावय। अइसने 2450 प्रश्न म 105 प्रश्न के विलोपन के जवाब किथे के ये आयोग या संस्था के एक सतत प्रक्रिया हावय। अइसने एकेच परीक्षा केंद्र ले 88 अभ्यर्थी के चिन्हांकन के बात तको निराधार अउ असत्य आए।    

जानबा होवय के छत्तीसगढ़ लोक सेवा आयोग म अभ्यर्थी वीरेन्द्र कुमार पटेल के शिकायत म आयोग खुदे जांच करके स्पष्टीकरण दे हावय। जबकि जानकार मनके कहना हावय के कोनो आन एजेंसी ले जांच कराना रिहिसे, काबर के युवा मनके भविष्य के सवाल हाए। खुदे अपने शिकायत के अपनेच ह जांच कर दीस 2 घंटा के भीतर। ये सेती कोन सच अउ कोन झूठ येकर फरी-फरकत नी हो सकत हाबे। 

बड़का सवाल इहू खड़ा होथे के अतेक प्रश्न ह कइसे गलत हो सकत हाबे। आखीर ये परीक्षा म लइका मन साल-साल भरके मेहनत लगे रिथे। कोन चयन करथे अइसन प्रश्न अउ उंकर जवाब येकरों तो जवाब देना परही छत्तीसगढ़ लोक सेवा ल।