खेलो इंडिया योजना बर खिलाड़ी मनके पंजीयन 9 फरवरी तक

अंजोर.रायपुर। खेल अउ युवा कल्याण विभाग कोति ले बिलासपुर म भारत सरकार के खेलो इंडिया योजना के अंर्तगत खेलो इंडिया सेन्टर ऑफ एक्सिलेंस सुरू करे गे हावय। ये सेन्टर एक आवासीय खेल अकादमी होही, जेमा हॉकी, एथलेटिक्स अउ तीरंदाजी के बालक-बालिका मपला खेल के नि:शुल्क प्रशिक्षण दे जाही। बिलासपुर के साथ-साथ रायपुर म तको खेल विभाग कोति ले राज्य स्तरीय खेल अकादमी सुरू करे जात हावय। ये खेल अकादमी म जेन बालक बालिका मनला ल प्रवेश मिलही ओ मनला आवास, भोजन, शैक्षणिक व्यय, खेल परिधान, दुर्घटना बीमा, खेल प्रशिक्षण सुविधा खेल विभाग कोति ले फोकट म दे जाही। रायपुर अउ बिलासपुर के अकादमी म प्रवेश खातिर 09 ले 17 वर्ष तक आयु वर्ग के बालक-बालिका जोन हॉकी, एथलेटिक्स, तीरंदाजी म रूचि रखथे अउ बिलासपुर या रायपुर म नियमित रूप ले रहके खेल प्रशिक्षण प्राप्त करना चाहत होही ओमन चयन प्रक्रिया म सम्मिलित हो सकत हावय। जिला स्तरीय सलेक्शन ट्रायल माह फरवरी के दूसर-तीसर सप्ताह म आयोजित करे जाही। जेकर तिथि अलग ले जारी करे जाही। जिला स्तरीय सलेक्शन ट्रायल म चयनित बालक-बालिका ल राज्य स्तरीय सलेक्शन ट्रायल म सम्मिलित कराये जाही।