अंजोर.रायपुर। कोरोना के बाढ़त संक्रमण ल देखत छत्तीसगढ़ माध्यमिक शिक्षा मण्डल रायपुर कोति ले आयोजित होवइया 10वीं के परीक्षा जेन ह 15 अप्रेल ले होवइया रिहिस, प्रदेश के मुखिया दाऊ भूपेश बघेल ह लइका मनके हित म स्थगित करे के बड़का फइसला ले हावय। येकर आरो ओमन आज अपन पत्रकार अउ संपादक मन संग ऑनलाइन संवाद म दिस।
ओमन बताइन के ये संबंध म शिक्षा मंत्री अउ अधिकारी मनले चर्चा होगे हावय, लघियात निर्देश तको जारी हो जही। काबर के अभी के बखत म चारो कोति कोरोना के बढ़त संक्रमण अउ केऊ जिला म लॉकडाउन के स्थिति हावय अइसन म परीक्षा लेना बने नइ होही।
दाऊ जी ह किहिन के 10वीं अउ 12वीं के परीक्षा लेना ये सेती जरूरी हावय के जब ओ लइका ह आगू कोनो प्रतियोगी परीक्षा या नौकरी बर जाही तव इही बोर्ड कक्षा ले ही ओकर मुल्यांकन होही। लइका मनके भविष्य सदा दिन बर खराब नइ करे जा सकय जनरल प्रमोशन देके। बने बखत देखके फेर जोंगबो बोर्ड परीक्षा। अभी तो सिरिफ घरे म राहव सुरक्षित राहय अउ जम्मो माई-पिल्ला कोरोना गाईड के पालन करव।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।