कांकेर अउ महासमुंद म आरटीपीसीआर जांच, 30 अप्रैल ले होही वायरोलॉजी लैब के शुभारंभ

अंजोर.रायपुर। कांकेर अउ महासमुंद म भी 30 अप्रैल ले कोरोना के आरटीपीसीआर जांच के सुविधा सुरू हो जाही। स्वास्थ्य मंत्री टी.एस. सिंहदेव 30 अप्रैल के दुनों जिला मुख्यालय म वायरोलॉजी लैब के ऑनलाइन शुभारंभ करही। दू नवा आरटीपीसीआर लैब के शुरू हो जाये ले प्रदेश म रोजाना आरटीपीसीआर जांच के संख्या बढ़े के संग ही लोगन के रिपोर्ट भी जल्दी मिले लगही। 

कांकेर अउ महासमुंद जिला के सैंपल के संग दुनों लैब म जांच के शुरूआत करे जाही। लैब के क्षमता बढ़े के संग आसपास के जिला के सैंपल मनके भी जांच करे जा सकही। ये दुनों लैब के संचालन उहां शुरू होए नवा शासकीय मेडिकल कॉलेज के डीन के अधीन करे जाही। दुनों लैब म सेवा दे खातिर लैब प्रभारी, माइक्रोबॉयोलॉजिस्ट, सीनियर सांइटिस्ट, जूनियर साइंटिस्ट, लैब तकनीशियन अउ लैब सहायक ल संबंधित मेडिकल कॉलेज के माध्यम ले प्रशिक्षित करे जा चुके हावय।

आईसीएमआर के मानक के अनुरूप कांकेर अउ महासमुंद म उच्चस्तरीय वायरोलॉजी लैब के स्थापना करे गिस हावय। वायरोलॉजी लैब एक विशिष्ट प्रक्रिया ले संचालित होत हावय। एमे संभावित मरीज मन के सैम्पल के लाइसिस के बाद आरएनए ल बाहर निकाले जात हावय। फेर ए आरएनए ले आरटीपीसीआर प्रक्रिया के माध्यम ले वायरस के पहचान करे जात हावय। ए पूरी प्रक्रिया ल पूरा करे के खातिर माइक्रोबॉयोलॉजिस्ट, सीनियर सांइटिस्ट, जूनियर साइंटिस्ट, लैब टेक्निशियन अउ लैब अटेंडेंट के जरूरत होत हावय। ए रकम के लैब एक मानक मापदण्डों के अनुरूप संचालित करे जात हावयं।

प्रदेश म आरटीपीसीआर जांच के संख्या बढ़ाये खातिर स्वास्थ्य विभाग डहर ले कोरबा, कोरिया, जशपुर, जांजगीर, दुर्ग, दंतेवाड़ा अउ बलौदाबाजार म भी वायरोलॉजी लैब के स्थापना के काम सुरू करे जा चुके हावय। वर्तमान म एम्स रायपुर सहित प्रदेश के छह शासकीय मेडिकल कॉलेज रायपुर, जगदलपुर, राजनांदगांव, बिलासपुर, रायगढ़ अउ अंबिकापुर म कोरोना संक्रमित मनके पहचान के खातिर आरटीपीसीआर जांच करे जात हावय।