साल भर ले डर बगराये के बाद अब कोरोना दवाई के किट घर-घर, 50 लाख वैक्सीन डोज मंगाइस सरकार

अंजोर.रायपुर, 27 अप्रैल 2021। मुख्यमंत्री दाऊ भूपेश बघेल ह अपन निवास कार्यालय म वीडियो कॉन्फ्रेंसिंग के माध्यम ले राजधानी के मीडिया ले चर्चा करिन अउ उंकर ले जरूरी सुझाव लिस। ओमन किहिन के छत्तीसगढ़ म कोरोना ल हराये म कोनो भी रकम ले फंड्स के कमी नइ होन दे जाही। राज्य म सबके सहयोग ले कोरोना ल जल्दीो ले जल्दीि हराना हावय। मुख्यमंत्री श्री बघेल ह चर्चा करत किहिन के राज्य म वर्तमान सरकार के आते ही स्वास्थ्य सुविधा के विस्तार के खातिर हर संभव पहल करे गिस अउ मरीज मन ल बढि़या इलाज के खातिर स्वास्थ्य सुविधा म कई गुना के वृद्धि करे गिस हावय। वर्तमान म राज्य म कोरोना संक्रमण के स्थिति म सतत निगरानी रखत हर जरूरी संसाधन के बेवस्था तत्परता ले करे जात हावय।

मुख्यमंत्री श्री बघेल ह किहिन के राज्य म वर्तमान म कोरोना संक्रमण ले बचाव अउ येकर रोकथाम के खातिर हर जरूरी प्रबंध करे जात हावयं। येकर तहत कोरोना के दवाई के किट ग्रामीण इलाका म लोगन के घर-घर तक उपलब्ध कराए जात हावयं। येकर ले संक्रमण रोके म काफी मदद मिलत हावय। ओमन बताइन के राज्य म अब तक 6 लाख 39 हजार 696 लोगन संक्रमित होए हावयं, जेमे ले 5 लाख 9 हजार 622 लोगन रिकवर करके चुके हावयं। वर्तमान म एक लाख 22 हजार 963 लोगन एक्टिव संक्रमित हावय। एक्टिव पेशेंट अनुपात 19.22 प्रतिशत के आसपास हावय, उहें रिकवरी के दर 79.67 प्रतिशत हावय। 

छत्तीसगढ़ कोविड वैक्सीनेशन के मामला म देश के कई विकसित अउ साधन सम्पन्न राज्य ल पाछु छोड़ चुके हावय। प्रदेश म 53 लाख ले जादा डोज वैक्सीन के लग चुके हावयं अउ देश के बड़े राज्य म हमर ठऊर दूसरा हावयं। छत्तीसगढ़ म अवइया 1 मई ले हम एक नया इतिहास रचत हावन। येकर तहत प्रदेश के 18 साल ले लेके 44 साल तक के लोगन ल मुफ्त म कोविड वैक्सीन लगही अउ येकर खातिर व्यापक कार्ययोजना तइयार कर ले गे हावय। एमे सीरम इंस्टीट्यूट अउ भारत बायोटेक दुनों के 25-25 लाख वैक्सीन डोज माने कुल 50 लाख डोज के खातिर आदेश के कर दे गे हावय। 

श्री बघेल ह आगू किहिन के हमन कोरोना के ए लड़ाई म फंड्स के कमी नइ होन दे के संकल्प ले हावन। राज्य म ये दो साल म स्वास्थ्य बजट म 880 करोड़ रूपए, एसडीआरएफ म ए साल 50 करोड़ रूपिया के प्रावधान करे हावय। इहां जनता ह बढ-चढ़के मुख्यमंत्री मदद कोष म मदद करे हावय, जेन सरकार म जनता के अटूट भरोसे के परिचायक हावय। ए कोष ले हमन अभी तक 73 करोड़ 53 लाख रूपिया कोविड के खिलाफ लड़ाई के खातिर जिला ल जारी कर चुके हावन। ए रकम अब तक 1003 करोड़ 53 लाख रूपिया स्वास्थ्य के क्षेत्र म लग चुके हावयं। उहें अब भी मुख्यमंत्री मदद कोष म 53 करोड़ 88 लाख रूपिया जमा हावय। उंकर उपयोग भी कोविड के लड़ाई म करे जाही। ओमन किहिन के कोरोना संक्रमण के संबंध म मृत्यु, आखरी संस्कार, दवा, ऑक्सीजन उक के बारे म कई भ्रॉमक खबर काफी वायरल होत हावय, जेकर नकारात्मक प्रभाव जनता म पड़ता हावय। अइसे हालात म ओमन मीडिया ले लोगन के भ्रम अउ भय के दूर करे अउ मरीज मन के मनोबल बढ़ाये वाले खबर के खातिर अपील करिन। ए मउका म सचिव जनसम्पर्क डी.डी.सिंह अउ मुख्यमंत्री के सचिव सिद्धार्थ कोमल सिंह परदेशी, मुख्यमंत्री के सलाहकार राजेश तिवारी अउ रूचिर गर्ग उपस्थित रिहिस।