अंजोर.अम्बिकापुर। नक्सली मन ले लोहा लेवत वीरगति प्राप्त होए जिला के लखनपुर के गांव अमदला निवासी शहीद रमाशंकर पैकरा ल उंकर गृह गांव म पूरा राजकीय सम्मान के संग जनप्रतिनिधी अउ जिला के वरिष्ठ अधिकारी मन की मौजूदगी म आखरी विदाई दे गिस। ये मउका म सरी गांव नम आंखी ले बेटा ल बिदा करिस। शहीद रामाशंकर पैंकरा के चिता ल मुखाग्नि उंकर छोटे भाई जयसिंह ह दीस। ये मउका म केंद्रीय जनजातीय कार्य राज्य मंत्री श्रीमती रेणुका सिंह, लुण्ड्रा विधायक डॉ. प्रीतम राम, जिला पंचायत अध्यक्ष श्रीमती मधु सिंह, पुलिस महानिरीक्षक आरपी साय, कलेक्टर संजीव कुमार झा, पुलिस अधीक्षक टीआर कोशिमा ह शहीद जवान रमाशंकर पैंकरा के पार्थिव शरीर म पुष्पचक्र अर्पित करके सलामी दीस।
गांव म अमदला के लाल अमर रहे ले गुंजात रिहिस, गमगीन माहौल म वीर शहीद रमाशंकर पैंकरा के पार्थिब देह पहुंचे ले परिवार के संग पूरा गांव रोवे लगगे। आखरी दर्शन ले लेके आखरी संस्कार तक के गमगीन माहौल म अमदला के लाल अमर रहे, वंदे-मातरम, जब तक सूरज चांद रइही रमाशंकर तोर नाम रइही के नारे गुंजायमान होत रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।