राज्य शासन के दिशा-निर्देश के पालन नइ करे के सेती आनंद अस्पताल बलौदाबाजार के अनुमति निरस्त

अंजोर.बलौदाबाजार, 21 अप्रैल 2021। जिला मुख्यालय बलौदाबाजार के आनंद अस्पताल ल कोविड मरीज मनके इलाज के खातिर पहिली दे अनुमति ल निरस्त कर दे गे हावय। अस्पताल प्रबंधन अब कोविड के नवा मरी मनके भरती करके इलाज नइ कर पाही। फेर पहिली ले भरती करे गे मरीज मन के डिस्चार्ज होत तक पूरा इलाज करे जाही। 

मिले आरो के मुताबिक मुख्य चिकित्सा अउ स्वास्थ्य अधिकारी बलौदाबाजार ह अस्पताल ल दे गे अनुमति के निरस्तीकरण आदेश आज जारी करे हावय। जानबा होवय के अस्पताल प्रबंधन डहर ले इलाज म आईसीएमआर अउ राज्य शासन डहर ले कोविड मरीज मनके उपचार संबंधी जारी दिशा-निर्देश के पालन नइ करे जात रिहिस। जिला अधिकारी मन के टीम ह अस्पताल के कुछ दिन पहिली निरीक्षण करके उन म जुर्माना भी लगाए रिहिस। बड़ संख्या म कोविड मरीज मनके सामने आये म आपातकालीन इलाज के खातिर आनंद अस्पताल ल स्वास्थ्य विभाग डहर ले अनुमति प्रदान करे गे रिहिस।