भगवान महावीर ह समाज ल सत्य, अहिंसा, प्रेम अउ करूणा के संदेश दिस : राज्यपाल अनुसुईया उईके

अंजोर.रायपुर, 24 अप्रैल 2021। राज्यपाल सुश्री अनुसुईया उइके ह जैन धर्म के 24वें तीर्थंकर महावीर स्वामी के जयंती के मउका म प्रदेशवासी मनला के हार्दिक बधाई अउ शुभकामना दीस हावय। राज्यपाल ह किहिन के भगवान महावीर ह समाज म व्याप्त अंधविश्वास, आडम्बर अउ कुरीति ल खतम करे म जोर दीस। ओमन सत्य, अहिंसा, प्रेम अउ करुणा के संदेश दीस। राज्यपाल सुश्री उइके ह किहिन के भगवान महावीर के सिद्धांत अउ उपदेश आज भी जनसामान्य के खातिर प्रासंगिक हावय। भगवान महावीर के जीवन हम सबो ल अनुशासन, तप अउ संयम ल अपन जीवन म उतारने के संदेश देत हावय। ओमन किहिन के भगवान महावीर के अहिंसा के दर्शन अशांत विश्व ल शांति के सन्देश दे सकत हावय अउ दुनिया ल हिंसा अउ आतंकवाद ले मुक्ति दिला सकत हावय। भगवान महावीर के जीवन आदर्श ल पालन करे म हम सबो प्रकृति के अनुकुल रइही अउ सदैव निरोगी रइही अउ संक्रामक बीमारी ले भी हमर रक्षा होही।