भारत सरकार ल मिले वाले दर म राज्य मनला तको टीका मिलय : मुख्यमंत्री भूपेश बघेल

अजोर.रायपुर, 23 अप्रैल 2021। मुख्यमंत्री भूपेश बघेल ह प्रधानमंत्री नरेंद्र मोदी ले केंद्र सरकार ल कोरोना के टीके मिले के दर म ही राज्य ल तको टीका उपलब्ध कराने के गेलौली करे हावय। ओमन किहिन के येकर ले राज्य म वित्तीय भार कम होही। मुख्यमंत्री ह स्वास्थ्य कर्मी, फ्रंटलाइन वर्कर्स अउ 45 साल ले जादा उमर के लोगन के टीकाकरण के खातिर प्रदेश के केंद्र सरकार ले मिले वाले वैक्सीन के आपूर्ति के समय सारणी ले भी अवगत कराये के गेलौली करे हावय, जेकर ले राज्य म सबो पात्र लोगन के टीकाकरण के योजना बनाये जा सके। श्री बघेल ह प्रधानमंत्री श्री नरेंद्र मोदी के अध्यक्षता म आज आने-आने राज्य के मुख्यमंत्री मनके संग कोरोना रोकथाम के बेवस्था अउ टीकाकरण के प्रगति के वर्चुअल समीक्षा बइठक म ये अनुरोध करिस। 

मुख्यमंत्री ह बइठक म प्रधानमंत्री ले किहिन के जे रकम ले ऑक्सीजन उत्पादक राज्य अपन जरूरत के बाद के अतिरिक्त आक्सीजन प्राथमिकता ले दूसर राज्य ल उपलब्ध करात हावयं। वइसने रेडमेसिविर अउ आन जीवन रक्षक दवाई के उत्पादक राज्य प्राथमिकता ले दूसर राज्य ल उपलब्ध कराएं। येकर खातिर भारत सरकार डहर ले गाइडलाइन जारी करे जाना चाही। 

रेडमेसिविर के कालाबाजारी रोके अउ जरुरतमंद तक एला पहुंचाये के खातिर बेवस्था बनाई गे हावय। मुख्यमंत्री ह प्रधानमंत्री ल अवगत कराइन के चिकित्सा विशेषज्ञ अउ सामाजिक संगठन मनके संग ही सबो नगरीय निकाय अउ  पंचायतीराज संस्था ले सरलग चर्चा करके कोरोना प्रबंधन म उंकर सहायता ले जात हावय। डीएमएफ, सीएसआर, सांसद निधि विधायक निधि अउ महापौर निधि के राशि के भी उपयोग कोविड-19 की रोकथाम के खातिर व्यवस्था विकसित करे म करे जात हावय।