समिति म बांचे धान के होवय लघियात निराकरण: दाऊ भूपेश बघेल

अंजोर.रायपुर, 20 अप्रैल 2021। मुख्यमंत्री भूपेश बघेल ह आज इहां राजधानी के अपन निवास कार्यालय म आयोजित बइठक म राज्य म खरीफ विपणन साल 2020-21 म उपार्जित धान के निराकरण अउ कस्टम मिलिंग के प्रगति के समीक्षा करिन। ओमन ए बखत समिति मन म बांचे धान के लघियात निराकरण के खातिर जरूरी निर्देश दिस। संग म समिति मन म निराकरण बर बांचे धान के उचित रख-रखाव के खातिर भी निर्देशित करिन। 

जानबा होवय के खरीफ विपणन साल 2020-21 म उपार्जित कुल 92 लाख मीट्रिक टन धान म ले 47.37 लाख मीट्रिक टन धान डी.ओ. के माध्यम ले मिलर्स ल प्रदाय करे जा चुके हावय अउ 19.68 लाख मीट्रिक टन धान टी.ओ. के माध्यम ले संग्रहण केन्द्र मनला प्रदाय करे गे हावय। आज तक नीलामी के माध्यम ले 4.59 लाख मीट्रिक टन धान के विक्रय करे जा चुके हावय। ए रकम ले समिति म वर्तमान म 20.36 लाख मीट्रिक टन धान निराकरण बर बांचे हावय। ए मउका म मुख्य सचिव अमिताभ जैन, अपर मुख्य सचिव सुब्रत साहू, मुख्यमंत्री के सचिव सिद्धार्थ कोमल सिंह परदेशी अउ मार्कफेड के प्रबंध संचालक अंकित आनंद उपस्थित रिहिस।