बने-बने लहुंट आगे कमांडो राकेश्वर सिंह, 11 सदस्य के टीम करिस नक्सली मनले मुहांचाही

अंजोर.बीजापुर। थाना तर्रेम बीजापुर के जंगल म पाछू दिन होए नक्सली मुठभेड़ म 22 जवान शहीद होगिन, केऊ झिन घायल हावय, जेमन के ईलाज अस्पताल म चलत हाबे। इही बीच नक्सली मन कोति ले एक जवान के उंकर कब्जा  म होए के जानकारी दे गिस, अऊ सरकार ल गोठबात करे खातिर सटका धरे बर किहिन। सरकार कोति ले 11 झिन सटका भेजे गिस जेमा सामाजिक कार्यकर्ता, समाज प्रमुख अउ पत्रकार मन सामिल रिहिन। पांच दिन तक उंकर कब्जा म रेहे के बाद कोबरा कमांडो राकेश्वर सिंह के आज बने-बने वापसी होगे। 

मिले आरो के मुताबिक नक्सली मन जवान ल गांव म छोडि़न तहान ओला पत्रकार अऊ कुछ साथी मन केन्प लानिस। नक्सली अउ सटका मनके बीच का-का गोठबात होइस ये सब तो भितरी बात आए फेर सबले बने बुता इही होइस के नक्सली मन सही सलामत जवान ल छोड़ दिस। सेना के जवान के पहिली स्वास्थ्य जांच हो सकत हाबे, बाद म घर तको जाही अउ अपन परिवार वाले संग मिलही।