बने-बने सोचत डॉक्टर के बताये उपाय ल अमल करव सबो राई टर जही

अंजोर.रायपुर, 24 अप्रैल 2021। कोरोना वायरस ले संक्रमित होए के बाद सकारात्मक सोच, कोविड के नियम के पालन अउ डॉक्टर मन डहर ले सरलग दे जात सलाह के सही तरीके ले अनुसरण करत कोरोना ले जंग जीते जा सकत हावय। अइसे ही कोरोना ले जंग जीते धमतरी जिला के विष्णु पटेल, अरूण कुमार साहू अउ दुबेश्वर बिसेन ह लोगन ले अपन विचार साझा करे हावय। धमतरी के हटकेशर वार्ड निवासी 65 वर्षीय विष्णु पटेल ह किहिन के बुखार, खांसी-सर्दी होए म ओमन कोविड जांच कराईस। रिपोर्ट म कोविड पॉजीटिव आये के बाद 15 अप्रैल के वो जिला अस्पताल के कोविड सेंटर म भरती होगे, जिहां ले ठीक होके वो आठ दिन बाद 23 अप्रैल के घर लौटे हावय। उंकर कहना हावय अब वो बढि़या महसूस करत हावयं, मगर थोड़ कमजोरी अभी भी हावय जेन समय के संग संतुलित खानपान, रहन सहन अउ कोविड के नियम के पालन करत रेहे ले ज़रूर दूर हो जाही। कुरूद के गांव कोंडापार के 40 वर्षीय अरूण कुमार साहू ह बताइन के बीमार पड़े के बाद वो घबरागे रिहिस। फेर चिकित्सक अउ स्वास्थ्य कर्मी के सहयोगात्मक रवैया, कोविड के नियम के कड़ाई ले पालन अउ सकारात्मक सोच के सेती ले आज वो सही-सलामत घर म हावयं।  

इही रकम ले नगरी के गांव भैंसासांकरा के दुबेश्वर बिसेन ह बताइन के ओमन कोरोना जांच कराई,  रिपोर्ट पॉजीटिव आये के बाद वो छः दिन तक होम आइसोलेशन म रिहिके स्वास्थ्य लाभ लेत रिहिस। फेर सातवा दिन ओला दस्त के शिकायत होए म तुरते कोविड अस्पताल नगरी म भरती होगे। उहां सात दिन तक इलाज कराये के बाद स्वस्थ होके घर लौटे हावय। ओमन खुसी ले सबो ल समझाइश दीस हावय के कोरोना ले डरे नहीं, बल्कि सकारात्मक सोच अउ चिकित्सक डहर ले बताए जात बचाव के उपाय ल गंभीरता ले आत्मसात करें। निश्चित ही कोरोना ले जंग जीते जा सकत हावय।