नगरीय प्रशासन मंत्री डॉ शिवकुमार डहरिया ह पहुंचिस मेकाहारा, डॉक्टर ले जानिस मरीज मनके हालचाल

अंजोर.रायपुर, 25 अप्रैल 2021। नगरीय प्रशासन अउ विकास अउ श्रम मंत्री डॉ. शिवकुमार डहरिया ह आज डॉ भीमराव अम्बेडकर अस्पताल मेडिकल कॉलेज पहुंच के इहाँ के अधीक्षक सहित कोविड के उपचार म लगे डॉक्टर मन ले मुलाकात करिन अउ अस्पताल म कोविड उपचार के वस्तुस्थिति के आरो‍ लिस। ओमन डॉक्टर मन के बुता के सराहना भी करिन।

मंत्री डॉ डहरिया ह डॉ. अम्बेडकर अस्पताल के अधीक्षक डॉ. विनीत जैन, मेडिकल कालेज के डीन डॉ. विष्णुदत्त सहित विशेषज्ञ डॉक्टर मन ले कोविड वार्ड अउ आईसीयू म उपलब्ध सुविधा अउ मरीज मन के संबंध म जानकारी लिस। इहाँ अस्पताल प्रबंधन डहर ले बताइन गिस के कोविड मरीज मन के उपचार के खातिर हर संभव बेवस्था करे जात हावय। ऑक्सीजन, वेंटिलेटर सहित जरूरी दवाइ जरूरत मुताबिक उपलब्ध कराये जात हावय। 

मंत्री डॉ. डहरिया ह अस्पताल प्रबंधन डहर ले करे बेवस्था म संतुष्टि जताईस अउ किहिन के ए संकट के समय म आप लोगन के सेवा कोनो भगवान ले बढ़के नइ हावय। ओमन किहिन के आप लोगन के प्रयास ले निश्चित ही कोविड मरीज मन ल सही उपचार उपलब्ध होही। प्राथमिकता होना चाही के गंभीर मरीज मन के जादा धियान देते उपचार सुनिश्चित करें। मरीज बहुत ही भरोसा के संग अस्पताल आत हावयं अउ इहाँ डॉक्टर के देखते ही उंकर आत्मविश्वास अउ मनोबल बढ़ जात हावय। आप सबो उंकर विश्वास अउ मनोबल ल बढ़ाये रखहू त निश्चित ही मरीज मन ल फायदा होही। येकर ले आप मनला भी खुशी होही। मंत्री डॉ. डहरिया ह बताइन के मुख्यमंत्री भूपेश बघेल के नेतृत्व म सरलग कोविड संक्रमण के रोकथाम के खातिर प्रदेश के हर जिला के समीक्षा करे जात हावय। हमन समन्वित प्रयास ले कोरोना ल हराना हावय।