टीकाकरण खातिर स्वास्थ्य कर्मी अउ फ्रंटलाइन वर्कर्स के नवा नाम नइ जुड़य : स्वास्थ्य मंत्रालय

अंजोर.रायपुर। कोरोना टीकाकरण के खातिर स्वास्थ्य कर्मी (Health Care Workers) अउ फ्रंटलाइन वर्कर्स के श्रेणी म अब नया पंजीयन नइ करे जाही। केन्द्रीय स्वास्थ्य अउ परिवार कल्याण मंत्रालय ह एनईजीवीएसी (NEGVAC - National Expert Group on Vaccine Administration for COVID-19) के सिफारिश म ये श्रेणी म टीकाकरण के नवा पंजीयन म तत्काल रोक लगा दीस हावय। स्वास्थ्य अउ परिवार कल्याण मंत्रालय के सचिव राजेश भूषण ह ए संबंध म 3 अप्रैल के सबो राज्य ल परिपत्र जारी करे हावय। ओमन टीकाकरण ले संबंधित अधिकारी मन ल येकर जानकारी देत अउ अनुपालन के निर्देश दे हावय।

स्वास्थ्य अउ परिवार कल्याण मंत्रालय ह परिपत्र म किहिन हावय के राज्य मनके प्रतिनिधी अउ डोमेन नॉलेज (Domain Knowledge) विशेषज्ञ मनके संग समीक्षा म एनईजीवीएसी ह पाये हावय के कुछ टीकाकरण केंद्र म स्वास्थ्य कर्मी अउ फ्रंटलाइन वर्कर्स के रूप म अपात्र मनके पंजीयन करके टीकाकरण करे जात रिहिन हावय जेन भारत सरकार डहर ले कोरोना वैक्सीनेशन के खातिर जारी दिशा-निर्देश के उल्लंघन हावय। ये दुनों श्रेणियों म टीकाकरण के खातिर पंजीकृत लाभार्थी मनके संख्या म पाछू कुछ दिन म 24 प्रतिशत के बढ़ोतरी देखे गे हावय। एनईजीवीएसी के सिफारिश म दुनों श्रेणी म नवा पंजीयन ल तत्काल बंद करे जात हावय। कोविन पोर्टल म 45 अउ येकर ले जादा उमर के लोगन के पंजीयन जारी रइही। स्वास्थ्य कर्मी अउ फ्रंटलाइन वर्कर्स के रूप म पहिली म पंजीकृत लोगन के कोविड टीकाकरण यथाशीघ्र सुनिश्चित करे जाही।