आलीखुंटा के दुलरवा वीर शहीद जगतराम के आखरी दरस बर उमडि़स गांव

अंजोर.डोंगरगांव। बीजापुर के तर्रेम जंगल म होए नक्सली मुठभेड़ म अपन प्राण के आहुति देवइया वीर शहीद जगतराम कंवर के शहादत ल सरी देश नमन करत हावय। जब ओ गांव म आरो मिलिस जिहा वीर सपूत बचपन गुजारे हावय, नानपन के संगी-संगवारी अउ महतारी-बाप उपर जबर दुख के पहाड़ टूटगे। फेर अपन बेटा के शहादत म ओमन ल गरब तको हावय। शहीद जगतराम कंवर के पार्थिव शरीर उंकर गृहग्राम राजनाँदगाँव जिला के डोंगरगांव विकासखण्ड के गांव आलीखुंटा पहुंचिस तव आखरी दरस करे बर गांव के गांव उमड़गे। 

ये मउका म पूर्व सांसद अभिषेक सिंह, मधुसूदन यादव सहित जिला के बड़का अधिकारी मन वीर सपूत के गांव पहुंचिन। आलीखुंटा म शहीद जगतराम कंवर जी के अंत्येष्टि कार्यक्रम म शामिल होवत पूर्व सांसद ह नक्सली मनके कायराना हरकत के निंदा करत सबो जवान मनके प्रति दुख जतावत शहीद मनला नमन करिस अउ घायल मनके लघियात बने होए के कामना करिन। शहीद जगतराम कंवर के परिजन ले भेंट करके ओ मनला ढाढ़स बँधाइस।