कांग्रेस अउ सहयोगी गठबंधन सरकार के बड़का फइसला, राज्य म होही मुफ्त टीकाकरण

अंजोर.रायपुर। देश भर म कोरोना के दूसरा लहर चलत हाबे। अऊ पाछू एक साल के बीच हम कतका साव चेत रेहेन अउ आम जनता के जीव बचाये खातिर का का उदीम करेन येला देश देखत हावय। मउत के दुवारी म खड़े लोगन मन बर, पियास मरे म कुआं खोदे कस उदीम होवत हावय। अब 1 मई ले 18 बछर ले आगर के लोगन ल कोरोना के टीका लगना हावय फेर केन्द्र सरकार ह अभी तक टीका के दाम ल तय नइ कर पाये हावय। कंपनी ह दाम तय करत केन्द्र सरकार बर अलग राज्यव सरकार बर अलग अउ निजी अस्पताल बर अलग दाम तय करे हावय। 

अइसन म कोन का करही ये तो बाद के बात आए फेर जिहा-जिहा कांग्रेस के अउ उंकर सहयोगी मनके सरकार हावय उहां-उहां फोकट म टीकाकरण के बड़का फइसला ले गे हावय। ये बात के आरो करत पार्टी के आधिकारिक सोशल मीडिया पोस्ट ल प्रदेश सरकार के मुखिया दाऊ भूपेश बघेल तको साझा करे हावय। बताये के हावय के कांग्रेस अउ सहयोगी गठबंधन सरकार ह 18 बछर अउ ओकर ले आगर के उमर के लोगन मनके टीका के खर्चा ल राज्य सरकार खुद वहन करही। केंद्र सरकार ह टीका के खर्च वहन करे ले अपना हाथ खड़ा कर ले हावय अउ कंपनी ल धन उगाही के खुली छूट दे रखे हावय।