मितानिन मनला अब घर बैठे मिलही कोरोना कीट फोकट म : कलेक्टर सुनील कुमार जैन

अंजोर.बलौदाबाजार, 24 अप्रैल 2021। शहर अउ ग्रामीण अंचल म रइहया लोगन म कोरोना के लक्षण दिखतें या संक्रमित के सम्पर्क म आये म अब ओला घर बइठे ही मितानिन के माध्यम ले कोरोना के फोकट म दवाइ उपलब्ध कराये जाही। समय म दवाई मिल जाये ले मरीज मन के स्थिती गंभीर नइ होही। जांच के पहिली ही दवाइ लक्षण वाले मनखे मन ल दे के खातिर स्वास्थ्य विभाग डहर ले आदेश जारी हो चुके हावयं। 

स्वास्थ्य विभाग ह जिला भर के मितानिन मनल कोरोना संक्रमण के दवाइ के पैकेट वितरण भी कर दे हावयं। शहर अउ ग्रामीण अंचल म कोरोना के लक्षण दिखाई दे के बाद भी कई लोगन कोरोना जांच नइ करात हावय अउ झोलाछाप, अपंजीकृत डॉक्टर के सम्पर्क म आके अनाप शनाप दवाइ के सेवन करके संक्रमण बढ़ाये के बाद गंभीर हालत म अइसे लोगन अस्पताल पहुँचत हावय, जेन परिवार अउ आन लोगन म संक्रमण फैला चुके हावय। काबर के ये लोगन के समय म कोरोना के दवाइ नइ मिले के सेती ये स्थिती बनत हावय। जेकर लापरवाही के चलत अनके लोगन ल अपन जान गवाये पड़े हावयं। कलेक्टर सुनील कुमार जैन ह आज राज्य शासन के निर्देश म स्वास्थ्य विभाग के अधिकारी मन ल निर्देश देतें सबोच घर तक मितानिन के माध्यम ले प्रोफाइलेक्टिक दवाइ के पहुँचाये के लक्ष्य रखे हावय। येकर खातिर जिला के सबो मेडिकल अधिकारी मन, मितानिन अउ एएनएम, ग्रामीण स्वास्थ्य संयोजक ल निर्देश जारी करे गे हावय।

कलेक्टर ह अपील करे हावय के कोरोना के लक्षण दिखे या संक्रमित के सम्पर्क म आये म वो ह मितानिन के माध्यम ले कोरोना के फोकट म दवाइ ले सकत हावय। मितानिन अउ एएनएम के पास दवाइ नइ मिले म अपन नजदीकी स्वास्थ्य केंद्र म जाके दवाई ले सकत हावयं। येकर संग ही 45 साल ले जादा उमर के लोगन अनिवार्य रूप ले टीकाकारण कराये। कोरोना वैक्सीन के टीकाकारण सम्बंधित अपवाह अउ भ्रांति ले बचें। टीकाकरण कोरोना ले बचाव के कवच के समान हावय।