कोविड पाजिटिव घर म ‘चेतावनी’ चिन्हा नहीं, उपचार म धियान देवय निगम

अंजोर.दुर्ग। कोविड पाजिटिव मरीज मन के घर के सामने सबो निगम डहर ले स्टीकर के संग ही स्टेनसिल ले चेतावनी के चिन्ह भी लगाये जात हावयं। स्टीकर के संग ही ए रकम के चिन्ह लगाये ले येला हटाये जाना संभव नी होही, संग ही बेरा भी स्पष्ट होही। अउ ए रकम के चिन्ह लगाये ले कोरोना पाजिटिव मरीज मन के खातिर आइसोलेशन के गाइडलान के पालन आसान होही। चिन्ह देखके कोनो भी इंकर घर नइ आये। कभी-कभी ये देखे गे हावय के कोरोना पाजिटिव मरीज घर के सामने स्टीकर निकाल देत हावयं ये चिन्ह लगाये जाये ले आसपड़ोस के लोगन के खातिर भी सावधानी रखे म आसानी होही।  

जानबा होवय के चेतावनी के संग ही घर म पोस्टर भी लगाये गे हावयं जेमे जानकारी थोकिन विस्तार ले हावय। जेन पाजिटिव मरीज मन ल होम आइसोलेशन के अनुमति दे गे हावय, उंकर खातिर सख्त प्रावधान हावय के अपन घर ले बाहर नइ निकलें। निगम प्रशासन डहर ले ए रकम ले उपाय करे जाये ले बढि़या मानिटरिंग म मदद मिलही। अइसे प्रशासन के कहना हावय, फेर येकर आन रूप तको देखे बर मिलते हावय, कोनो ओकर घर कोति झांके बर नइ जावे, परोसी मन तको सोज नजर ले नइ देखे। चेतावनी लिखे ले अइसे लगाथे के कोनो अनित कर डारे होही, का प्रशासन कना चेतावनी ले आन आखर नइये जेमा लोगन ल जानकारी तको होवय अउ अनित करे कस झिन लागे। चेतावनी कोन ल दे जात हावय, काकर बर चेतावनी अउ कइसे चेतावनी... कोनो आन मया के भाखा लिखे जाए जेकर ले लोगन ल कोरोना पाजिटिव मनके मन ले सहानुभूति होवय न की डर।